Արաբագիտության ամբիոնը՝ որպես ԵՊՀ գիտաուսումնական ինքնուրույն ստորաբաժանում, հիմնվել է 1992 թ.–ին, երբ ԵՊՀ գիտխորհրդի որոշմամբ Արաբական և թուրքական բանասիրության և Արևելքի երկրների պատմության ամբիոնների վերակազմավորման արդյունքում ստեղծվեց Արաբագիտության ամբիոն։
Արաբերենը դասավանդվել է Երևանի համալսարանում նրա հիմնադրման առաջին օրերից, 40-ական թթ.-ին բանասիրական ֆակուլտետի կազմում ձևավորվել է արևելյան լեզուների ամբիոն, իսկ 1968 թ.-ից, երբ հիմնվեց արևելագիտության ֆակուլտետը, այդ ամբիոնը բաժանվեց երկու՝ իրանական բանասիրության և արաբական և թուրքական բանասիրության ամբիոնների։
Այժմ ամբիոնի գիտակրթական գործունեության ոլորտը ներառում է արաբագիտության բոլոր հիմնական ուղղությունները. լեզվաբանությունը, միջնադարյան արաբական մշակույթն ու պատմությունը, իսլամագիտությունը, նոր և նորագույն ժամանակների արաբական գրականությունը, ժամանակակից տարածաշրջանային խնդիրների ուսումնասիրությունը, ինչպես նաև եբրայագիտությունը։
2009 թ.-ից արաբագիտության ամբիոնի գործող վարիչն է պ.գ.թ. դոցենտ Հ. Քոչարյանը:

Երևանի պետական համալսարանում թուրքերենը դասավանդվում է 1943 թ.-ից, ինչի անմիջական նախաձեռնողն ու կազմակերպիչն էր մեծանուն արևելագետ Հրաչյա Աճառյանը, իսկ առաջին դասախոսը` Մինաս Մինասյանը:
ԵՊՀ թուրքագիտության ամբիոնը հիմնադրվել է 1991 թ.-ին` արաբական և թուրքական բանասիրության ամբիոնի վերակազմավորման արդյունքում: Ամբիոնի հիմնադիր-վարիչն էր պ.գ.դ., բ.գ.թ., պրոֆեսոր Մերի Հրաչյայի Քոչարը (1936 - 1994), ով ավարտել էր Մոսկվայի պետական համալսարանը, աշակերտել նախկին Խորհրդային Միության առաջատար բանասերներին և արևելագետներին (մասնավորապես հայազգի ճանաչված թյուրքագետ-լեզվաբան Է. Վ. Սևորդյանին): Բացառիկ արժեքավոր են պրոֆ. Մ. Քոչարի թե´ լեզվաբանական, թե´ գրականագիտական և թե´ պատմագիտական աշխատությունները:
ԵՊՀ թուրքագիտության ամբիոնում դասավանդել են վաստակաշատ արևելագետներ Ե. Սարգսյանը, Ջ. Կիրակոսյանը, Ա. Մինասյանը, Խ. Ամիրյանը, Հ. Մարտիրոսյանը և ուրիշներ: Ներկայումս ամբիոնում դասավանդում են ՀՀ ԳԱԱ ակադեմիկոս, պրոֆեսոր +Ռ. Սաֆրաստյանը և ՀՀ ԳԱԱ թղթակից անդամ, պրոֆեսոր Ա. Խառատյանը:
2010 թ.-ին ԵՊՀ թուրքագիտության ամբիոնը վերակազմավորվել է թյուրքագիտության ամբիոնի: Ամբիոնի գծով դասավանդվում են թուրքերեն, օսմաներեն, ադրբեջաներեն, ղազախերեն, թյուրքալեզու ժողովուրդների գրականության, մշակույթի ու պատմության հիմնահարցերին առնչվող դասընթացներ: Ամբիոնում հայաստանյան իրականության մեջ առաջին անգամ պատրաստվել են բարձրագույն որակավորմամբ մասնագետներ` «թուրքերեն լեզու» և «թուրք գրականություն» մասնագիտությամբ, ստեղծվել է թուրքերենի` հայերենով գրված առաջին դասագիրքը, որն արդեն իսկ ունեցել է վեց հրատարակություն: Ներկայումս հիշյալ դասագիրքը օգտագործվում է ոչ միայն Հայաստանի, այլև սփյուռքի բոլոր այն բարձրագույն և միջնակարգ ուսումնական հաստատություններում, որտեղ դասավանդվում է թուրքերեն:
2010 թ.-ին ՀՀ-ում Ղազախստանի դեսպանության աջակցությամբ բացվել է «Ղազախերենի, ղազախական մշակույթի ու պատմության կենտրոնը», որը համանման առաջին հաստատությունն էր աշխարհում:
Ամբիոնի դասախոսների վերջին տարիների աշխատանքները տարբեր լեզուներով հրատարակվել են Ֆրանսիայում, ԱՄՆ-ում, Նիդերլանդներում, Կանադայում, Գերմանիայում, Ռուսաստանում, Լեհաստանում, Թուրքիայում, Իրանում, Ղազախստանում, Թուրքմենստանում, Չինաստանում, Հունաստանում:
1996 թ.-ից ամբիոնի վարիչն է պատմական գիտությունների թեկնածու, պրոֆեսոր Ալեքսանդր Սաֆարյանը:

Հայաստանում իրանագիտության պատմությունը սկսվում է Երևանի համալսարանի գոյության գրեթե առաջին տարիներից: Երևանի պետական համալսարանի հիմադրումից ընդամենը մի քանի տարի անց 1923թ.-ին Թավրիզից ԵՊՀ է հրավիրվում նշանավոր լեզվաբան Հրաչյա Աճառյանը և ստանձնում է պարսկերենի, սանսկրիտի, ինչպես նաև պարսից լեզվի պատմության դասավանդումը: Ուսանած լինելով դասական արևելագիտության և հայագիտության հայտնի մասնագետների մոտ, Հ. Աճառյանը ԵՊՀ է բերում միջազգային դասական իրանագիտության ավանդույթները, որոնք հետագա տարիներին պահպանվելով և զարգանալով հասնում են մինչև մեր օրերը:
1940թ.-ին ԵՊՀ բանասիրական ֆակուլտետում բացվում է արևելյան բանասիրության ամբիոնը, որի Արևելյան լեզուների և գրականության բաժնի երկու ճյուղերից մեկը իրանականն էր: 1968թ.-ին, երբ ԵՊՀ-ում որպես առանձին ֆակուլտետ կազմավորվում է արևելագիտության ֆակուլտետը, դրա մաս կազմող ամբիոններից մեկը հենց իրանական բանասիրության ամբիոնն էր, որ հիման վրա էլ ձևավորվել է ներկայիս իրանագիտության ամբիոնը: 1973-1997թթ.-ին իրանագիտության ամբիոնը գլխավորել բ.գ.դ., պրոֆ. Գևորգ Նալբանդյանը, 1997-2014թթ.՝ բ.գ.դ., պրոֆ. Գառնիկ Ասատրյանը: 2014թ.-ից ամբիոնի ղեկավարումը ստանձնել է բ.գ.թ., դոց. Վարդան Ոսկանյանը:
Ամբիոնի գիտահետազոտական և կրթական հետաքրքրությունների շրջանակն ընդգրկում է իրանագիտական ուղղությունների գրեթե ողջ բույլը՝ կենդանի և մեռած իրանական լեզուներ և բարբառներ (պարսկերեն, աֆղաներեն, քրդերեն, թալիշերեն, թաթերեն, պարթևերեն, միջին պարսկերեն, հին պարսկերեն), Իրանի և իրանալեզու տարածքների պատմություն և երկրագիտություն, իրանական լեզվաբանություն և բանասիրություն, Իրանի գրականություն, իրանական մշակույթի և քաղաքակրթության պատմություն, իրանալեզու էթնիկ-դավանական խմբերի ուսումնասիրություն, Իրանի և մերձավորարևելյան տարածաշրջանի արդի քաղաքական հիմնախնդիրներ և այլն:
Ամբիոնի շրջանավարտները հաջողությամբ աշխատում են գիտության, կրթության, միջազգային հարաբերությունների, դիվանագիտության ասպարեզներում, պետական կառավարման համակարգում, պետական և մասնավոր կազմակերպություններում և բազմաթիվ այլ ոլորտներում:

Իրանագիտության ամբիոնին կից գործում է Իսլամագիտության կենտրոնը, որի գիտական հետաքրքրության հիմնական ասպարեզներն են տասներկուիմամական շիայականությունը, ինչպես նաև իսլամի այլ ուղղությունների ուսումնասիրությունը: Կենտրոնը բացվել է 2013թ.-ին ԵՊՀ-ի և Թեհրանի հումանիտար և մշակութային հետազոտությունների ինստիտուտի միջև համագործակցության շրջանակներում: Բացի գիտահետազոտական աշխատանքներից կենտրոնում պարբերաբար դասախոսություններ են կարդում Իրանի առաջատար համալսարանների դասախոսներ և գիտնականներ, ինչպես նաև ԵՊՀ այցելող բարձրաստիճան իրանցի հոգևորականներ: Իսլամագիտության կենտրոնն ունի մասնագիտական գրականության առանձին ֆոնդ, որը պարբերաբար համալրվում է:

ԵՊՀ-ի և Աստանայի՝ Գումիլյովի անվան եվրասիական ազգային համալսարանի միջև կնքված համագործակցության համաձայնագրի շրջանակներում 2010թ. Արևելագիտության ֆակուլտետի թյուրքագիտության ամբիոնին կից գործում է Ղազախական մշակույթի, լեզվի, գրականության և պատմության կենտրոնը: Նշենք, որ կենտրոնի ստեղծման և զարգացման աշխատանքներին մշտապես իր անմիջական աջակցությունն է ցուցաբերել նաև Հայաստանում Ղազախստանի դեսպանատունը:

ԵՊՀ-ի և ԵԱՀ-ի համագործակցության համաձայնագրի շրջանակներում իրականացվել են մի շարք համատեղ ծրագրեր, այդ թվում գիտական կոնֆերանսներ, գիտական աշխատանքների հրատարակում Երևանում և Աստանայում, ղազախ ժամանակակից գրողների պատվիրակության ընդունելություն Հայաստանում, ինչպես նաև ուսանողների, դասախոսների փոխանակություն և վերապատրաստում: Կենտրոնի շրջանակներում 2011թ. թյուրքագիտության ամբիոնի ուսանողներին ղազախերեն է դասավանդել ԵԱՀ-ի դասախոս, բ.գ.թ. Այնուռ Նայմանբաևան: 2013թ.-ից ԵԱՀ թյուրքագիտության ամբիոնի մագիստրոսները վերապատրաստվում են ԵՊՀ-ում: 2014թ. թյուրքագիտության ամբիոնի ասպիրանտ Շուշան Խաչատրյանը եռամսյա վերապատրաստում է անցել ԵԱՀ-ում, ղազախական առաջատար պարբերականներում հրատարակել ղազախերեն և ռուսերեն հոդվածներ: Թյուրքագիտության ամբիոնի վարիչ, պրոֆեսոր Ալ. Սաֆարյանը և ամբիոնի դասախոսները մասնակցել են Աստանայում կազմակերպվող գիտաժողովների, դասախոսություններով հանդես եկել ԵԱՀ-ում:

Կենտրոնի շրջանակներում թյուրքագիտության ամբիոնի ուսանողներն այժմ էլ հնարավորություն ունեն ուսանելու ղազախերեն ու ղազախական գրականություն: