16.02.2021 | 
Քաղաքականություն
ԿՈԿԱ-ԿՈԼԱ ՀԲՔԱ-Ի ԱՋԱԿՑՈՒԹՅԱՄԲ ԵՊՀ-ՈՒՄ ԲԱՑՎԵԼՈՒ Է ՏԵՍԱԽԱՂԵՐԻ ՍՏԵՂԾՄԱՆ ԵՎ ԶԱՐԳԱՑՄԱՆ ՆՈՐ ՀԱՐԹԱԿ
ԿՈԿԱ-ԿՈԼԱ ՀԲՔԱ-Ի ԱՋԱԿՑՈՒԹՅԱՄԲ ԵՊՀ-ՈՒՄ ԲԱՑՎԵԼՈՒ Է ՏԵՍԱԽԱՂԵՐԻ ՍՏԵՂԾՄԱՆ ԵՎ ԶԱՐԳԱՑՄԱՆ ՆՈՐ ՀԱՐԹԱԿ
ԵՊՀ-ի և «Կոկա-Կոլա ՀԲՔԱ» ընկերության միջև այսօր կնքվել է համագործակցության հուշագիր, որի նպատակն է խթանել ՏՏ ոլորտի, ինչպես նաև երիտասարդների համապատասխան հմտությունների զարգացումը՝ ստեղծելով «Coca-Cola Video Games Lab YSU» վերապատրաստման և զարգացման հարթակը:

Կրթական և տեղեկատվական տեխնոլոգիաների ոլորտներում, մասնավորապես՝ աշխարհում արագ զարգացող տեսախաղերի արդյունաբերության ոլորտում ԵՊՀ-ի և «Կոկա-Կոլա ՀԲՔԱ» ընկերության միջև հաստատված համագործակցության նպատակներից է ստեղծել «Coca-Cola Video Games Lab YSU» վերապատրաստման և զարգացման հարթակը:

 

Այն հնարավորություն կտա երիտասարդներին ձեռք բերելու տեսախաղերի ստեղծման համար անհրաժեշտ տեխնիկական գիտելիքներ, տեսախաղերի բիզնեսի առաջխաղացման հմտություններ, ինչպիսիք են՝ ֆինանսներ, շուկայավարում, թվային արտադրանքների զարգացման PR և այլն:

 

ԵՊՀ ռեկտորի ժ.պ. Գեղամ Գևորգյանն այսօր տեղի ունեցած արարողությանը նշեց, որ համագործակցության արդյունքում ստեղծվող հարթակը հնարավորություն կտա ստեղծելու միջավայր, որտեղ շնորհալի երիտասարդները ձեռք կբերեն նոր գիտելիք և հմտություններ, կհամագործակցեն միմյանց հետ և կստեղծեն նոր արտադրանք: Նրա խոսքով, տեսախաղերի ստեղծումը չի կարող դասավանդվել որպես առանձին մասնագիտություն, բայց մյուս կողմից՝  երիտասարդներին հնարավորություն չընձեռելը նույնպես ճիշտ չէ, իսկ դա հնարավոր կլինի համագործակցության արդյունքում:

 

 

«Կոկա-Կոլա Հելլենիկ Արմենիայի» գլխավոր տնօրեն Արթուր Սահակյանի խոսքով, երիտասարդների զարգացումն ընկերության կորպորատիվ սոցիալական պատասխանատվության քաղաքականության շրջանակում իրականացվող գործունեության առանցքային ուղղություններից է: Նրա փաստմամբ, ընկերության համար շատ կարևոր է գիտության զարգացումը, քանի որ բիզնեսը և գիտությունը փոխկապակցված են, և զարգացած գիտությունն է հենց նախապայմանը, որ զարգանա բիզնես միջավայրը:   

 

«Մեր ընկերությունը կարևորում է որակյալ կրթության նախապայմանների առկայությունը և զարգացումը Հայաստանում, իսկ այդ ամենի հիմքը բիզնեսի և պետական կառույցների համագործակցությունն է: Լինելով Հայաստանում խոշոր գործատուներից մեկը՝ մեր ընկերությունն իր առաքելությունն է համարում նպաստել կրթության լավագույն հնարավորություններին, իսկ ԵՊՀ-ն էլ, լինելով Հայաստանի լավագույն բուհերից մեկը, տրամադրում է բոլոր պայմանները նախաձեռնությունը կյանքի կոչելու համար»,- մեզ հետ զրույցում ասաց Արթուր Սահակյանը:

 

«Coca-Cola Video Games Lab YSU» հարթակի աշխատանքների համակարգող, ԵՊՀ կիրառական էլեկտրադինամիկայի և մոդելավորման ամբիոնի վարիչ Արսեն Բաբաջանյանն էլ պարզաբանեց, որ հարթակը ստեղծվելու է ԵՊՀ տարածքում՝ ԿԿՀԲՔԱ կողմից կահավորված անհրաժեշտ բոլոր սարքավորումներով:

 

Նրա տեղեկացմամբ, «Կոկա-Կոլա ՀԲՔԱ» ղեկավար թիմի անդամները, խաղերի ծրագրավորման մասնագետները, ԵՊՀ դասախոսական կազմի անդամներ և հրավիրված մասնագետները դասընթացների և մենթորության նախագծերի շնորհիվ մասնագիտական գիտելիք և փորձ կփոխանցեն երիտասարդներին, որից հետո վերապատրաստումն անցած անհատները և թիմերը հնարավորություն կունենան իրականացնելու իրենց մտահղացումները՝ օգտագործելով հարթակի ռեսուրսներն ու հնարավորությունները:          

 

Արսեն Բաբաջանյանի խոսքով, հարթակում իրականացվող բոլոր դասընթացներն  անվճար են լինելու: Պլանավորվում է առաջին խումբը հավաքագրել մինչև մարտի մեկը (գրանցվել այստեղ), և անցկացնել եռամսյա արագացված դասընթացներ, որից հետո արդեն  ստացված գիտելիքներով և հմտություններով իրականացնել հարթակի համակարգումը:

 

«Կոկա-Կոլա Հելլենիկ Արմենիա» ընկերության հասարակական կապերի և հաղորդակցության ղեկավար Էլինա Մարգարյանն էլ փաստեց, որ ընկերությունը շատ լավ պատկերացում ունի բոլոր այն մասնագիտական ու անձնական հմտությունների մասին, որոնք ներկայիս աշխատաշուկայում մեծ պահանջարկ ունեն, և պատրաստ է իր փորձով նպաստելու երիտասարդների մասնագիտական ներուժի զարգացմանը:

 

Քնար Միսակյան

 


Այլ նորություններ
ԵՊՀ ՀՈԳԱԲԱՐՁՈՒՆԵՐԻ ԽՈՐՀՐԴԻ ՆԻՍՏԸ ՏԵՂԻ ՉԻ ՈՒՆԵՑԵԼ. ՆԵՐԿԱ ԵՆ ԵՂԵԼ ՄԻԱՅՆ ՀԱՄԱԼՍԱՐԱՆԱԿԱՆ ԱՆԴԱՄՆԵՐԸ
ԵՊՀ հոգաբարձուների խորհրդի այսօր հրավիրված նիստը չի կայացել՝ քվեակազմի բացակայության պատճառով. 32 անդամներից ներկա էին 14-ը:
«ՍԵՐՎԻՍԻ ԿԱԶՄԱԿԵՐՊԻՉ/ՄԵՆԵՋՄԵՆՏ» ԽՈՐԱԳՐՈՎ ԴԱՍԱԽՈՍՈՒԹՅՈՒՆ ԵՐԵՎԱՆԻ ԹԻՎ 190 ԱՎԱԳ ԴՊՐՈՑՈՒՄ
ԵՊՀ աշխարհագրության և երկրաբանության ֆակուլտետի սերվիսի ամբիոնի վարիչ Սեյրան Սուվարյանն այսօր «Սերվիսի կազմակերպիչ/մենեջմենտ» խորագրով դասախոսություն է կարդացել Երևանի թիվ 190 ավագ դպրոցում: