01.09.2022 | 
Կրթություն, Գիտություն
ՆՈԲԵԼՅԱՆ ՄՐՑԱՆԱԿԱԿԻՐ ԴՈՆՆԱ ՍԹՐԻՔԼԵՆԴԸ ԵՊՀ ՖԻԶԻԿԱՅԻ ՖԱԿՈՒԼՏԵՏՈՒՄ ՀԱՆԴԵՍ ԵԿԱՎ ԴԱՍԱԽՈՍՈՒԹՅԱՄԲ
ՆՈԲԵԼՅԱՆ ՄՐՑԱՆԱԿԱԿԻՐ ԴՈՆՆԱ ՍԹՐԻՔԼԵՆԴԸ ԵՊՀ ՖԻԶԻԿԱՅԻ ՖԱԿՈՒԼՏԵՏՈՒՄ ՀԱՆԴԵՍ ԵԿԱՎ ԴԱՍԱԽՈՍՈՒԹՅԱՄԲ
Օգոստոսի 29-ից սեպտեմբերի 3-ն անցկացվող Օպտիկայի և ֆոտոնիկայի ժամանակակից կիրառություններին նվիրված միջազգային դպրոցի (MAOP-2022) շրջանակում ԵՊՀ-ն հյուրընկալեց Նոբելյան մրցանակակիր, Վաթեռլոյի համալսարանի պրոֆեսոր, Սթարմուսի շրջանակում Հայաստան ժամանած ֆիզիկոս Դոննա Սթրիքլենդին:

ԵՊՀ ֆիզիկայի ֆակուլտետի կոնֆերենց դահլիճում կայացած դասախոսության ընթացքում պրոֆեսոր Դ. Սթրիքլենդը ներկայացրեց իր նոբելյան դասախոսությունը՝ «Բարձր ինտենսիվությամբ գերարագ օպտիկական իմպուլսների գեներացում» թեմայով, և ծանոթացրեց ոլորտի նորարարություններին։

 

Անդրադառնալով Նոբելյան մրցանակի արժանացած հայտնագործության կիրառական նշանակությանը՝ Վաթեռլոյի համալսարանի պրոֆեսորը նշեց․ «1984 թվականին ես և իմ գիտական ղեկավար Խերարդ Մորուն հայտնագործել ենք բարձր ինտենսիվությամբ գերարագ օպտիկական իմպուլսների գեներացման մեթոդները, որի համար 2018 թվականին մեզ շնորհվել է Նոբելյան մրցանակ: Այս հայտնագործությունն այժմ աչքի լազերային վիրահատության հիմքն է և հնարավորություն է տալիս վերականգնելու տեսողությունը՝ առանց աչքը վնասելու։ Մենք լազերային իմպուլսները ժամանակի ընթացքում լայնացրել ենք, ապա ուժեղացրել և սեղման ենթարկել, ինչի շնորհիվ իմպուլսի էներգիայի հսկայական աճ է գրանցվել: Չիպավորված իմպուլսները մեծ կիրառություն ունեն տարբեր բնագավառներում»:

 

 

Պրոֆեսորը ներկաներին հորդորեց լինել նպատակասլաց ու երբեք չհանձնվել։


«Հաջողակ գիտնական լինելու համար պետք է հավատաս ինքդ քեզ: Եթե դու իսկապես հավատում ես, որ դա այն բնագավառն է, որտեղ կարող ես լիարժեք դրսևորել կարողություններդ, ոչ ոք չի կարող քեզ կանգնեցնել»,- հորդորեց հրավիրյալ բանախոսը:

 

ԵՊՀ ֆիզիկայի ֆակուլտետի դեկան Ռաֆիկ Հակոբյանը մեզ հետ զրույցում նշեց, որ այսօրինակ դասախոսությունների կազմակերպումը ֆակուլտետում շարունակական բնույթ է կրելու։

 

«Մեզ համար անչափ կարևոր է, որ մեր ուսանողներն ու պրոֆեսորադասախոսական անձնակազմը շփվեն մեծանուն գիտնականների հետ և ունկնդրեն նրանց դասախոսությունները», - ասաց Ռ. Հակոբյանը:

 

 

MAOP 2022-ի համակազմակերպիչ, Բրյուսելի ազատ համալսարանի գիտաշխատող Տաթևիկ Չալյանը, խոսելով դպրոցի առջև դրված նպատակներից, ընդգծեց, որ նպատակ ունեն մասնակիցներին փոխանցելու ժամանակակից կիրառական ճյուղերի մասին ֆունդամենտալ գիտելիքներ և կիրառական օրինակներ։

 

«Ցանկանում ենք ցույց տալ, թե որ ուղղություններն են ավելի արդիական, ինչ ուղղություններով աշխատելու դեպքում մեծ հնարավորություններ կարելի է ստանալ ժամանակակից օպտիկայի և ֆոտոնիկայի բնագավառում»,- մեզ հետ զրույցում ասաց Տ․ Չալյանը: 

 

 

Հանդիպմանը ներկա դասախոսները, գիտաշխատողներն ու ասպիրանտները դասախոսությունից հետո պրոֆեսորին տվեցին իրենց հետաքրքրող հարցերը, և ծավալվեց ակտիվ քննարկում։

 

Նշենք, որ Երևանի պետական համալսարանում և Հայ-ռուսական համալսարանում այս տարի կազմակերպված Օպտիկայի և ֆոտոնիկայի ժամանակակից կիրառություններին նվիրված միջազգային դպրոցի (MAOP-2022) ուսումնասիրության երեք հիմնական ուղղություններն են՝ բիոֆոտոնիկա, քվանտային տեխնոլոգիաներ և արհեստական բանականության կիրառությունը ֆիզիկայում: Դպրոցին մասնակցում են ինչպես հայ, այնպես էլ արտասահմանցի մասնակիցներ, որոնք հնարավորություն ունեն լսելու Բելգիայից, Հոլանդիայից, Հունաստանից, Ռուսաստանից հրավիրյալ մասնագետների դասախոսությունները, ինչպես նաև ԱՄՆ-ից, Ֆրանսիայից, Դանիայից և Ռուսաստանից մասնագետների առցանց դասախոսությունները: 

 

Հիշեցնենք, որ ս․թ․ սեպտեմբերի 5-9-ը «ԵՊՀ-Սթարմուս Նոբելյան շաբաթ» խորագրով միջոցառման շրջանակում ԵՊՀ-Սթարմուս համագործակցության շրջանակում համալսարան են այցելելու Նոբելյան մրցանակի դափնեկիր ֆիզիկոսներ և աստղաֆիզիկոսներ Քիփ Թորնը (սեպտեմբերի 5-ին՝ ժամը 11։00-ին), Միշել Մայորը (սեպտեմբերի 6-ին՝ ժամը 11։00-ին) և Էմանուել Շարպենտիեն (սեպտեմբերի 7-ին՝ ժամը 11։00-ին)։

 

Սեպտեմբերի 9-ին՝ ժամը 11։00-ին, նախատեսվում է «Տիեզերք և ներշնչանք» խորագրով պանելային քննարկում՝ հայազգի տիեզերագնաց Ջիմ Բաղյանի, ԵՊՀ շրջանավարտ, Սթարմուս փառատոնի հիմնադիր, աստղաֆիզիկոս Գարիկ Իսրայելյանի և գրող Դեյվիդ Ջոն Էյքրի մասնակցությամբ։


Պանելային քննարկման ընթացքում բացման խոսքով հանդես է գալու ԵՊՀ ռեկտոր Հովհաննես Հովհաննիսյանը։

 

Դասախոսություններն ու պանելային քննարկումը կանցկացվեն անգլերենով։

 

 

 

Այլ նորություններ
ՀԱՄԱԼՍԱՐԱՆԱԿԱՆՆԵՐԸ ԴԻՏԵՑԻՆ «…ԵՎ ՆՈՐԻՑ ԳԱՐՈՒՆ» ՆԵՐԿԱՅԱՑՈՒՄԸ
ԵՊՀ Շառլ Ազնավուրի անվան մշակույթի կենտրոնի նախաձեռնությամբ «Համալսարանական» թատրոն-ստուդիայի սաները Ս. Սարգսյանի անվան համազգային թատրոնում դիտեցին ներկայացում, որի ավարտին տեղի ունեցավ քննարկում ներկայացման ստեղծագործական և դերասանական կազմի հետ:
ԵՐԻՏԱՍԱՐԴՆԵՐԻ ԳԻՏԱԿԱՆ ՄԻՏՔՆ ԱՄՓՈՓՎԵԼ Է «ԵՊՀ ՈՒԳԸ ՀՈԴՎԱԾՆԵՐԻ ԺՈՂՈՎԱԾՈՒԻ» ՏՊԱԳԻՐ ՀԱՏՈՐՆԵՐՈՒՄ. ՇՆՈՐՀԱՆԴԵՍ ԵՊՀ-ՈՒՄ
ԵՊՀ գիտական խորհրդի նիստերի դահլիճում տեղի ունեցավ «ՈՒԳԸ գիտական հոդվածների ժողովածու» երիտասարդական գիտական պարբերականի Բնական և ֆիզիկամաթեմատիկական գիտությունների՝ 1.1 (35), Հումանիտար և հասարակական գիտությունների 1.2 (36) համարների շնորհանդեսը: