22.11.2021 | 
Ուսանողական
ԻՐԱՎԱԳԵՏՆԵՐԻ ԲԱՆԱՎԵՃԻ ՄԱՍՆԱԳԻՏԱՑՎԱԾ ԱԿՈՒՄԲԻ ԱՌԱՋԻՆ՝ ԴԱՍԸՆԹԱՑՆԵՐԻ ՓՈՒԼՆ ԱՎԱՐՏՎԵԼ Է
ԻՐԱՎԱԳԵՏՆԵՐԻ ԲԱՆԱՎԵՃԻ ՄԱՍՆԱԳԻՏԱՑՎԱԾ ԱԿՈՒՄԲԻ ԱՌԱՋԻՆ՝ ԴԱՍԸՆԹԱՑՆԵՐԻ ՓՈՒԼՆ ԱՎԱՐՏՎԵԼ Է
ԵՊՀ իրավագիտության ֆակուլտետում գործող բանավեճի մասնագիտացված ակումբն իր գործունեության շրջանակում երկրորդ տարին անընդմեջ կազմակերպում է մեկշաբաթյա դասընթացներ, որոնց հաջորդում է բուն առաջնության փուլը:

«Արդեն իսկ իրականացրել ենք հինգ դասընթաց, որոնցից մի քանիսին, ակումբականներից բացի, մասնակցել են նաև այլ ուսանողներ: Ընդհանուր առմամբ դասընթացների փուլը միավորել է շուրջ 200 ուսանողի, սակայն առաջնությանը մասնակցելու են միայն ակումբականները, որոնց համար դասընթացներին մասնակցությունը պարտադիր է եղել»,- պարզաբանեց Իրավագիտության ֆակուլտետի ՈՒԽ նախագահ Գոհար Ավագյանը:   

 

Վերջինս ընդգծեց, որ Իրավագիտության ֆակուլտետի ուսանողների բանավիճելու հմտությունները պետք է զարգացնել առաջին իսկ կուրսից, իսկ մասնագիտական բանավեճերն էլ ավելի են կարևորվում:

 

 

Դասընթացներից առաջինը նվիրված է եղել բանավեճի տեխնիկային: Բանախոսը՝ բանավեճի ակումբի ղեկավար Դավիթ Թովմասյանը, ուսանողներին ներկայացրել է ակումբի գործունեությունը, խաղի կառուցվածքը, առանձնահատկությունները, միավորների բաշխման, հարցադրումների կազմման և հակափաստարկների ներկայացման գործնական հմտություններ:

 

 

«Բանավիճելու հոգեբանություն. մանիպուլյացիա և ներազդում» թեմայով երկրորդ դասընթացի բանախոսն էր ԵՊՀ փիլիսոփայության և հոգեբանության ֆակուլտետի դասախոս Սերոբ Խաչատրյանը: Վերջինս ուսանողների հետ խոսել է բանավեճի ընթացքում կիրառվող մանիպուլյացիոն հնարքների, ներազդման միջոցների մասին:

Հաջորդ թեման «Փաստարկումն» էր, որի վերաբերյալ բանախոսությամբ հանդես է եկել Փիլիսոփայության պատմության, տեսության և տրամաբանության ամբիոնի դասախոս, դոցենտ Մովսես Դեմիրճյանը: Նա ակումբականներին ծանոթացրել է փաստարկման հմտություններին և բանավեճի շրջանակում դրա դրսևորման առանձնահատկություններին։

 

 

 

Մասնագիտական 4-րդ դասընթացը, որը կրում էր «Իրավական հետազոտության հմտություններ, իրավավերլուծական համակարգեր» խորագիրը, վարել է Իրավագիտության ֆակուլտետի եվրոպական և միջազգային իրավունքի ամբիոնի դասախոս Գրիգոր Չոբանյանը: Վերջինիս հետ քննարկումը բաղկացած էր երկու փուլից՝ հետազոտական աշխատանքի իրականացում և դրա պատշաճ ներկայացում:

 

 

«Խոսքի մշակույթ և ճարտասանական հմտություններ» թեմայով վերջին քննարկման բանախոսը ֆակուլտետի ՈՒԽ նախագահ Գոհար Ավագյանն էր: Նա մասնակիցներին ներկայացրել է ելույթ ունենալու հմտությունները, խոսքի մշակույթը՝ ժեստիկուլյացիա, կեցվածք, ելույթի կառուցվածք, խոսքի վարպետություն, և այն հղկելու հնարավորությունները:

 

Դասընթացներին հաջորդել է հարցուպատասխանի փուլը, իսկ ավարտին կազմակերպվել է վիճակահանություն, որի արդյունքում պատահականության սկզբունքով ընտրվել է առաջնության հանդիպումների հաջորդականությունը:

 

Այլ նորություններ
«ԵՊՀ-ՈՒՄ Է ԳՈՐԾՈՒՄ ԻՐԱՆԱԳԻՏՈՒԹՅԱՆ ԼԱՎԱԳՈՒՅՆ ԴՊՐՈՑՆԵՐԻՑ ՄԵԿԸ». ԵՊՀ ՇՐՋԱՆԱՎԱՐՏ ՇՈՒՇԱՆ ԱԶԱՏՅԱՆ
ԵՊՀ արևելագիտության ֆակուլտետի իրանագիտության բաժնի շրջանավարտ Շուշան Ազատյանը վերջերս ավարտել է Թեհրանի Շահիդ Բեհեշթի համալսարանի ասպիրանտուրան (PhD)՝ ստանալով լեզվաբանության դոկտորի աստիճան: Նա վստահեցնում է, որ իրանագիտության լավագույն դպրոցներից մեկը գործում է ԵՊՀ-ում, և հենց ԵՊՀ-ն է նպաստել իր կրթության շարունակականությանը: Մայր բուհի շրջանավարտի հետ զրուցել ենք Թեհրանում ունեցած իր փորձառության և հետագա անելիքների մասին:
«ԵՊՀ-Ն ԻՆՁ ԸՆՁԵՌԵԼ Է ՈՉ ՄԻԱՅՆ ԳԻՏԵԼԻՔՆԵՐ, ԱՅԼԵՎ ԱՐՏԵՐԿՐԻ ՀԵՂԻՆԱԿԱՎՈՐ ԲՈՒՀԵՐԻՑ ՄԵԿՈՒՄ ՍՈՎՈՐԵԼՈՒ ՀՆԱՐԱՎՈՐՈՒԹՅՈՒՆ». ՖԻԶԻԿԱՅԻ ՖԱԿՈՒԼՏԵՏԻ ՇՐՋԱՆԱՎԱՐՏ ՎԱՀԱԳՆ ՄՈՒՐԱԴՅԱՆ
Համալսարանական Վահագն Մուրադյանը ԵՊՀ ֆիզիկայի ֆակուլտետում ձեռք է բերել ոչ միայն մասնագիտական հիմնարար գիտելիքներ և վերլուծական մտածողություն, որոնք նրան հնարավորություն են ընձեռել սովորելու արտերկրի հեղինակավոր բուհերից մեկում, այլև ուսանողական տարիների անփոխարինելի հուշեր և ընկերներ: