02.03.2022 | 
Հասարակություն
ՀԱՅ-ՃԱՊՈՆԱԿԱՆ ՀԱՐԱԲԵՐՈՒԹՅՈՒՆՆԵՐԻ ԶԱՐԳԱՑՄԱՆ ՆՈՐ ԽԹԱՆ. ԵՊՀ-Ն ՀՅՈՒՐԸՆԿԱԼԵԼ Է ՀՀ-ՈՒՄ ՃԱՊՈՆԻԱՅԻ ԱՐՏԱԿԱՐԳ ԵՎ ԼԻԱԶՈՐ ԴԵՍՊԱՆԻՆ
ՀԱՅ-ՃԱՊՈՆԱԿԱՆ ՀԱՐԱԲԵՐՈՒԹՅՈՒՆՆԵՐԻ ԶԱՐԳԱՑՄԱՆ ՆՈՐ ԽԹԱՆ. ԵՊՀ-Ն ՀՅՈՒՐԸՆԿԱԼԵԼ Է ՀՀ-ՈՒՄ ՃԱՊՈՆԻԱՅԻ ԱՐՏԱԿԱՐԳ ԵՎ ԼԻԱԶՈՐ ԴԵՍՊԱՆԻՆ
ԵՊՀ ռեկտոր Հովհաննես Հովհաննիսյանն այսօր հանդիպել է ՀՀ-ում Ճապոնիայի արտակարգ և լիազոր դեսպան Մասանորի Ֆուկուշիմայի հետ, նրա հետ քննարկել երկկողմ համագործակցության զարգացման հնարավորությունները և ընդլայնման հեռանկարը: Այնուհետև դեսպանն այցելել է ԵՊՀ միջազգային հարաբերությունների ֆակուլտետ և ուսանողներին ներկայացրել Ճապոնիայի կառավարության կողմից տրամադրվող կրթաթոշակի մասին:

Ողջունելով դեսպանին՝ ԵՊՀ ռեկտոր Հովհաննես Հովհաննիսյանը ներկայացրեց ԵՊՀ-ի զարգացմանն ու միջազգայնացմանն ուղղված ծրագրերը՝ նշելով, որ արվում է ամեն ինչ՝ տրամադրելու որակյալ կրթություն և ապահովելու նորարարական ու միջազգայնորեն մրցունակ հետազոտություններ իրականացնելու միջավայր:

 

Հ. Հովհաննիսյանը տեղեկացրեց, որ ԵՊՀ-ում սովորում են ճապոնացի ուսանողներ, դասավանդվում է ճապոներեն, որի նկատմամբ ուսանողների հետաքրքրությունը բավականին մեծ է:

 

 

Դեսպան Ֆուկուշիման ասաց, որ ԵՊՀ-ն իրավամբ Հայաստանի ամենաազդեցիկ բուհն է, նշեց, որ Հայաստանը Ճապոնիայի համար կարևոր գործընկեր է, ինչի վկայությունն են կառավարության կողմից իրագործված աջակցության բազմաթիվ ծրագրերը:

 

Ըստ դիվանագետի՝ իրենց համար առաջնային են երկու երկրների միջև տնտեսական, մշակութային ու գիտական հարաբերությունների զարգացումը, երիտասարդների միջև փոխանակման ծրագրերի իրականացումը: Նա վստահեցրեց, որ պատրաստ են աջակցել դրանց իրագործմանն ուղղված նախաձեռնություններին:

 

 

Հ. Հովհաննիսյանն արձագանքեց, որ ուսանողների փոխանակումն իսկապես շատ կարևոր է, սակայն կարևոր են նաև դասախոսների փոխանակումը, համատեղ հետազոտությունների իրականացումը, ինչպես նաև ակադեմիական և մշակութային միջոցառումների անցկացումը:

 

Միջազգային համագործակցության վարչության պետ Ալեքսանդր Մարգարովը ներկայացրեց ԵՊՀ-ի և Ճապոնիայի համալսարանների միջև առկա համագործակցությունը՝ նշելով, որ այս պահին գործում է 3 համաձայնագիր: Ա. Մարգարովն ասաց, որ ԵՊՀ-ն բաց է համագործակցության համար և սիրով պատրաստ է նոր կապեր հաստատել:

 

 

Կողմերը քննարկեցին մի քանի նոր գաղափար ու ծրագիր, որոնց իրագործումը կամրապնդի երկկողմ համագործակցությունը, կնպաստի երկու երկրների միջև հարաբերությունների զարգացմանը:

 

Այնուհետև ՀՀ-ում Ճապոնիայի արտակարգ և լիազոր դեսպանն այցելեց ԵՊՀ միջազգային հարաբերությունների ֆակուլտետ, հանդիպեց ուսանողների և պրոֆեսորադասախոսական կազմի հետ: Ֆակուլտետի դեկան Գեղամ Պետրոսյանը ներկայացրեց հայ-ճապոնական հարաբերությունների պատմությունը, առանձնահատկություններն ու զարգացման հեռանկարը:

 

 

Դեսպանը հանդիպման մասնակիցներին ներկայացրեց Ճապոնիայի կրթության, մշակույթի, սպորտի, գիտության և տեխնոլոգիայի նախարարության («MEXT») ծրագիրը, որը կրթաթոշակներ է սահմանում ճապոնական համալսարաններում սովորել ցանկացողներին:

 

 

Նրա խոսքով, այդ ծրագրի նպատակն է խթանել մարդկային ռեսուրսները, որոնք դառնալու են բարեկամության կամուրջ դրամաշնորհառու երկրի և Ճապոնիայի միջև՝ նպաստելով երկու երկրների հարաբերությունների զարգացմանը:

 

Ծրագրի մանրամասներն այստեղ՝ https://bit.ly/3C8RNB6 

Այլ նորություններ
ՀԱՅԿԱԿԱՆ ՄՇԱԿՈՒԹԱՅԻՆ ԺԱՌԱՆԳՈՒԹՅԱՆ ՈՉՆՉԱՑՄԱՆ ՎՏԱՆԳՆ ԱՐՑԱԽՈՒՄ․ ԳԻՏՆԱԿԱՆՆԵՐԸ ՀԱՆԴԵՍ ԵՆ ԵԿԵԼ ԿՈՉՈՎ
2022 թ․ հուլիսի 15-19-ը ԵՊՀ-ում և Հայ Առաքելական եկեղեցու Վայոց ձորի թեմում տեղի է ունեցել «Արցախի մշակութային ժառանգությունը» խորագրով միջազգային գիտաժողով, որի ընթացքում ավելի քան երեսուն օտարերկրյա և հայ գիտնականներ ու փորձագետներ քննարկել են Լեռնային Ղարաբաղի տարածաշրջանում մշակութային արժեքների ստեղծման, պատմական զարգացման և ներկայիս վտանգվածության խնդիրները։
ԿԵՆՍԱԲԱՆՈՒԹՅԱՆ ՄԻՋԱԶԳԱՅԻՆ ՕԼԻՄՊԻԱԴԱՅԻ ՄԱՍՆԱԿԻՑՆԵՐԸ ՇԱՐՈՒՆԱԿՈՒՄ ԵՆ ԲԱՑԱՀԱՅՏԵԼ ՀԱՅԱՍՏԱՆԸ
Այսօր հայոց պատմամշակութային ժառանգությանը ծանոթանալու նպատակով «Կենսաբանության 33-րդ միջազգային օլիմպիադայի» (ԿՄՕ) մասնակիցները շրջայց են կատարել «Էրեբունի» պատմահնագիտական արգելոց–թանգարանում, այնուհետև ճանաչողական էքսկուրսիա իրականացրել Մեսրոպ Մաշտոցի անվան Մատենադարանում: