22.06.2022 | 
Ուսանողական, Կրթություն
ԳԵՎՈՐԳ ԱՐՇԱԿՅԱՆԻ ԱՆՎԱՆ ԳԻՏԵԼԻՔԻ ԴՊՐՈՑԻ ՇՐՋԱՆԱՎԱՐՏՆԵՐԸ ՀԱՎԱՍՏԱԳՐԵՐ ՍՏԱՑԱՆ
ԳԵՎՈՐԳ ԱՐՇԱԿՅԱՆԻ ԱՆՎԱՆ ԳԻՏԵԼԻՔԻ ԴՊՐՈՑԻ ՇՐՋԱՆԱՎԱՐՏՆԵՐԸ ՀԱՎԱՍՏԱԳՐԵՐ ՍՏԱՑԱՆ
ԵՊՀ գիտական խորհրդի նիստերի դահլիճում տեղի ունեցավ «Գիտելիքի դպրոց»-ի շրջանավարտների ավարտական արարողությունը, որի ընթացքում ներկայացվեցին դպրոցի գործունեությունը, կատարված աշխատանքներն ու գրանցած հաջողությունները: Դպրոցի շրջանավարտներին հանձնվեցին հավաստագրեր և շնորհակալագրեր:

Կարևորելով ԵՊՀ ուսանողների հետ տարվող աշխատանքների կենտրոնում գործող դպրոցի դերը՝ կենտրոնի տնօրեն Վահագն Վարագյանն իր խոսքում նշեց. «Շատ ուսանողների համար այսօր խորհրդանշական օր է: Հուսով եմ՝ այս ամիսների ընթացքում ձեռք բերված գիտելիքները կօգտագործեք՝ ի նպաստ մեր երկրի: Ես ուզում եմ վստահ լինել, որ ձեր կյանքի ընթացքում ապրելու եք ազգային արժեհամակարգով, որը ձևավորել է «Գիտելիքի դպրոցը»»:

 

 

«Գիտելիքի դպրոց»-ի ղեկավար Լիլիթ Իշխանյանը, անդրադառնալով դպրոցի ստեղծման նախապատմությանը, ասաց. «Դպրոցի գաղափարը 44-օրյա պատերազմում անմահացած, Մարտական խաչ 1-ին աստիճանի շքանշանակիր, ԵՊՀ բրոնզե մեդալակիր Գևորգ Արշակյանինն էր, սակայն պատերազմը կիսատ թողեց նրա ծրագրերը․․․ Պատերազմից մեկ տարի անց մենք ընկերներով համախմբվեցինք այս նախաձեռնության շուրջ և ծրագիրը կյանքի կոչեցինք: Հատկանշական է, որ դպրոցի 2-րդ փուլի շրջանավարտների շարքում, բացի ԵՊՀ ուսանողներից, կան նաև այլ բուհերի ուսանողներ»:

 

 

«Գիտելիքի դպրոց»-ում դասընթացները վարել են ԵՊՀ բարձր կուրսերի ուսանողներն ու շրջանավարտները։ Մեզ հետ զրույցում դպրոցի դասընթացավար Տաթևիկ Դունամալյանը նշեց, որ իր համար պատիվ է եղել դպրոցում դասավանդելը:

 

««Գիտելիքի դպրոց»-ի շրջանակում ուսումնասիրել ենք Իրանը: Հընթացս փորձել եմ ուսանողներին փոխանցել Գևորգ Արշակյանի գաղափարները, ծանոթացնել նրա մարդկային որակներին և հայրենասիրությանը»,- ասաց նա:

 

 

Խոսելով դպրոցում ստացած գիտելիքներից և ընձեռված հնարավորություններից՝ ԵՊՀ ժուռնալիստիկայի ֆակուլտետի ուսանող, «Գիտելիքի դպրոց»-ի շրջանավարտ Լիանա Քարամյանն ասաց. «Դպրոցն ինձ տվեց գործնական բազմաթիվ հմտություններ, և դրա շնորհիվ էլ ավելի լավ ճանաչեցի մասնագիտությունս: Այս ամիսների ընթացքում ձեռք բերեցի շատ ընկերներ, որոնք ձևավորել էին այնպիսի մթնոլորտ, որտեղ մեր կարծիքներն ու գաղափարներն էինք փոխանակում: Մենք նաև այցելեցինք տարբեր հեռուստաընկերություններ, տեսանք՝ ինչպես են աշխատում, և դա ևս փորձ էր մեզ համար»:

 

 

Հիշեցնենք, որ «Գիտելիքի դպրոց»-ի շրջանակում կգործի նաև ամառային դպրոց, որի ընթացքում նախատեսվում է կազմակերպել երկշաբաթյա դասընթացներ, քննարկումներ, հանդիպումներ, թիմային աշխատանքներ, ինչպես նաև մասնագիտական ցուցահանդես, որտեղ կներկայացվեն ԵՊՀ-ում առկա մասնագիտությունները, աշխատանքային հնարավորություններն ու հեռանկարները։

Այլ նորություններ
ԵՊՀ-ՈՒՄ ՏԵՂԻ ՈՒՆԵՑԱՎ ECER 2022 ՀԱՄԱԺՈՂՈՎԻ ՇՐՋԱՆԱԿՈՒՄ ԿԱԶՄԱԿԵՐՊՎԱԾ ՄԱՄՈՒԼԻ ԱՍՈՒԼԻՍԸ
Ասուլիսի ժամանակ ներկայացվեցին համաժողովի կազմակերպման ընթացքը, ընտրված թեմայի արդիականությունը, ինչպես նաև ընդգծվեց համաժողովի կարևորությունը ՀՀ կրթական համակարգի զարգացման գործում։ Լրատվամիջոցների ներկայացուցիչներն ասուլիսի ավարտին տվեցին հարցեր՝ կապված համաժողովի, վերջինիս ընձեռած հնարավորությունների և ԵՊՀ-ում իրականացվող նկատելի բարեփոխումների վերաբերյալ։
ՄԱԹԵՄԱՏԻԿԱԿԱՆ ՄԻՋԱԶԳԱՅԻՆ ՈՒՍԱՆՈՂԱԿԱՆ ՕԼԻՄՊԻԱԴԱՅՈՒՄ ԵՊՀ ՀԻՆԳ ՈՒՍԱՆՈՂՆԵՐ ՄԵԴԱԼՆԵՐ ԵՆ ՆՎԱՃԵԼ
Օգոստոսի 1-7-ը հիբրիդային (առկա և առցանց) տարբերակով տեղի է ունեցել Մաթեմատիկական միջազգային ուսանողական 29-րդ օլիմպիադան (International Mathematics Competition), որին մասնակցել են աշխարհի ավելի քան 100 համալսարանի թիմեր: