14.12.2021 | 
Հասարակություն
«ԷՐԱԶՄՈՒՍ+» 2022 ԹՎԱԿԱՆԻ ԾՐԱԳՐԱՅԻՆ ՀԱՅՏԵՐԻ ՎԵՐԱԲԵՐՅԱԼ ԵՌՕՐՅԱ ՍԵՄԻՆԱՐ ԵՊՀ-ՈՒՄ
«ԷՐԱԶՄՈՒՍ+» 2022 ԹՎԱԿԱՆԻ ԾՐԱԳՐԱՅԻՆ ՀԱՅՏԵՐԻ ՎԵՐԱԲԵՐՅԱԼ ԵՌՕՐՅԱ ՍԵՄԻՆԱՐ ԵՊՀ-ՈՒՄ
ԵՊՀ գիտխորհրդի նիստերի դահլիճի նախասրահում մեկնարկել է Եվրոպական Միության «Էրազմուս+» 2022 թվականի ծրագրային հայտերի կառուցակարգերի, հիմնական պահանջների, ինչպես նաև արձանագրված թարմացումների մասին եռօրյա սեմինարը: Այն կազմակերպվել է ԵՊՀ միջազգային համագործակցության վարչության նախաձեռնությամբ:

Վերոնշյալ վարչության դրամաշնորհային բաժնի վարիչ Արսեն Ապրոյանը, որը վարում էր սեմինարը, շեշտեց, որ ծրագրերի հիմնական գերակայությունները կենտրոնացած են կայուն աճի, զարգացման, ինչպես նաև կրթության քաղաքականության շրջանակում արտաքին համագործակցության վրա:

 

Սեմինարի մասնակիցներին մանրամասն ներկայացվեց «Էրազմուս+» ծրագրերի իրականացման երկրորդ գործողությունը, որը տարբեր բուհերի և կազմակերպությունների միջև ինստիտուցիոնալ համագործակցությունն է. այն, ըստ երևույթին, նախկին «Tempus» ծրագրերի իրավահաջորդն է:

 

Բանախոսն անդրադարձավ ծրագրի նորություններին, 2022 թվականի հայտադիմումների առանձնահատկություններին, կարողությունների զարգացմանը միտված ծրագրերի շրջանակում բուհերին առաջարկվող հնարավորություններին:

 

 

Նա փաստեց, որ երկրորդ գործողության ընտրությունը պատահական չի եղել, քանի որ այն մինչ 2020 թվականը գրեթե նույնն է մնացել, իսկ այժմ 2021-2027 թվականների «Էրազմուս+» ծրագրերի իրականացման շրջանակում երկրորդ գործողությունը որոշակի փոփոխությունների է ենթարկվել, և հրապարակվել է նոր փաթեթը. «Այս դրամաշնորհային փաթեթը զարգացման, բարեփոխման, ուսուցման, գիտելիքի զարգացման և որոշակի հմտությունների փոխանակման շրջանակ է, որի շնորհիվ ցանկացած բուհի ֆակուլտետ կամ ստորաբաժանում կկարողանա նշված հարթության մեջ որոշակի ծրագրեր իրականացնել»:

 

Որոշակի սոցիալ-տնտեսական զարգացումների արդյունքում փոփոխությունների ենթարկված ծրագրային փաթեթը նախատեսում է մարդկային ռեսուրսների կատարելագործում, ինչպես նաև «COVID-19»-ի հետևանքով ընդհատված բարեփոխումների շարունակում. խոսքն ազգային, տարածաշրջանային, միջտարածաշրջանային և միջպետական ծրագրերի իրականացման մասին է, որոնք շատ ավելի համընդհանուր են և բազմակողմանի. «Ծրագրերում տեղ գտած բարեփոխումներով հանվել են տարածաշրջանային առաջնահերթությունները՝ փոխարինվելով համընդհանուրով, փոփոխվել են հայտերի ընդունման ձևերը, ինչպես նաև մշակվել են ծրագրային բյուջեի վարման նոր մեթոդներ»:

 

Ա. Ապրոյանը տեղեկացրեց, որ ԵՊՀ-ն՝ որպես Հայաստանի Մայր բուհ, պաշտոնապես իրավունք ունի դիմելու որպես ծրագրի համակարգող, ինչպես նաև դառնալու բուհերի կամ կազմակերպությունների ներկայացրած ծրագրերի մասնակիցը:

 

2021 թվականին մի շարք երկրներ «COVID-19»-ի պատճառով չեն կարողացել դիմել ծրագրին, դիմումներ չեն ընդունվել, իսկ այս տարի դեկտեմբերի 1-ից դիմումների առցանց ընդունելությունը սկսվել է, վերջնաժամկետը փետրվարի 17-ն է:

 

Սեմինարի վերջում բանախոսը պատասխանեց ներկաներին հուզող հարցերին:

 

 

Այլ նորություններ
«ՀԱՄԱԼՍԱՐԱՆԸ ՀԱՅԱԳԻՏԱԿԱՆ ՀՈՒՄԱՆԻՏԱՐ ԿԵՆՏՐՈՆ Է, ՈՐԸ ԳԻՏՈՒԹՅԱՆ ՆՎԱՃՈՒՄՆԵՐԻՆ ՈՒ ՁԵՌՔԲԵՐՈՒՄՆԵՐԻՆ ԻՄԱՍՏ ԵՎ ՀՈՂԵՂԵՆ ՄԱՐՄԻՆ Է ՏԱԼԻՍ». ՏԻԳՐԱՆ ՄԱՆՍՈՒՐՅԱՆ
ԵՊՀ Շառլ Ազնավուրի անվան մշակույթի կենտրոնում տեղի ունեցավ հանդիպում հայ կոմպոզիտոր, Հայաստանի Հանրապետության ժողովրդական արտիստ Տիգրան Մանսուրյանի հետ, որի ընթացքում համալսարանի ռեկտոր Հովհաննես Հովհաննիսյանը մաեստրոյին հանձնեց ԵՊՀ ոսկե մեդալ:
ԵՊՀ ՈՒՍԱՆՈՂՆԵՐԸ ՄՇՏԱՊԵՍ ՏԵՂԵԿԱՑՎԱԾ ԵՆ ԱՇԽԱՏԱՇՈՒԿԱՅԻ ԱՌԱՋԱՐԿՆԵՐԻՑ
ԵՊՀ ինֆորմատիկայի և կիրառական մաթեմատիկայի ֆակուլտետի կոնֆերենս դահլիճում տեղի ունեցավ «CV կազմելու և գործատուին ներկայանալու հմտություններ» խորագրով դասընթաց, որի ավարտին ուսանողները փոխանցեցին իրենց տվյալները՝ հետագայում աշխատանքի առաջարկների վերաբերյալ պարբերաբար տեղեկատվություն ստանալու նպատակով: