09.07.2021 | 
Կրթություն
ՎԵՐԱԶԻՆՎԱԾ ԼԱԲՈՐԱՏՈՐԻԱՅԻ ԲԱՑՈՒՄ, ԴԻՊԼՈՄՆԵՐԻ ՀԱՆՁՆՈՒՄ ՄԱԹԵՄԱՏԻԿԱՅԻ ԵՎ ՄԵԽԱՆԻԿԱՅԻ ՖԱԿՈՒԼՏԵՏՈՒՄ
ՎԵՐԱԶԻՆՎԱԾ ԼԱԲՈՐԱՏՈՐԻԱՅԻ ԲԱՑՈՒՄ, ԴԻՊԼՈՄՆԵՐԻ ՀԱՆՁՆՈՒՄ ՄԱԹԵՄԱՏԻԿԱՅԻ ԵՎ ՄԵԽԱՆԻԿԱՅԻ ՖԱԿՈՒԼՏԵՏՈՒՄ
ԵՊՀ մաթեմատիկայի և մեխանիկայի ֆակուլտետում այսօր տեղի է ունեցել լաբորատորիայի վերաբացման, ինչպես նաև շրջանավարտների դիպլոմների հանձնման արարողություններ:

Մաթեմատիկայի և մեխանիկայի ֆակուլտետում ԵՊՀ ռեկտորի ժամանակավոր պաշտոնակատար Գեղամ Գևորգյանի և ֆակուլտետի դեկան Արթուր Սահակյանի գլխավորությամբ հանդիսավոր արարողությամբ դիպլոմներ հանձնվեցին դեռևս երեք տարի առաջ մեկնարկած Կիրառական վիճակագրություն և տվյալների գիտություն մագիստրոսական ծրագրի շրջանավարտներին:

 

«Մագիստրոսական ծրագիրն արդեն երկրորդ շրջանավարտներն ունի, ինչը նշանակում է, որ այն հաջողությամբ է ընթանում: Շրջանավարտները գոհ են իրենց ստացած գիտելիքներից, և դա է վկայում նաև այն, որ նրանք կարողանում են հեշտության աշխատանք գտնել ոլորտի առաջատար ընկերություններում և լավագույնս կիրառել իրենց հմտությունները»,- նշեց ֆակուլտետի դեկանը և հավելեց, որ ծրագրի ստեղծման օրվանից լայն համագործակցություն է ծավալվել ՏՏ ոլորտի մի շարք կազմակերպությունների հետ:

 

 

Մագիստրոսական ծրագրի հիմքում ԵՊՀ երիտասարդ դասախոսներ Կարեն Քեռյանն ու Միքայել Պողոսյանն են, որոնց շնորհիվ էլ ծրագիրը մեծ հաջողությունների է հասել: Մասնավորապես, փոխգործակցելով ոլորտի ընկերությունների հետ, ֆակուլտետում ստեղծվել է համապատասխան լաբորատորիա, որն այսօր վերազինվել է նորագույն սարքավորումներով:

 

«Երբ անցյալ տարի ծրագիրն ունեցավ 30 դիմորդ, մենք հասկացանք, որ լաբորատորիան պետք է վերազինվի, իսկ համակարգիչների թիվը պետք է շատանա: Մեզ կրկին ձեռք մեկնեց մեր լավ գործընկեր «Krisp» ընկերությունը, որի միջոցով էլ այսօր մեր լաբորատորիան համալրվեց ևս 15 գերհզոր համակարգչով»,- ասաց Արթուր Սահակյանը և հատուկ շնորհակալություն հայտնեց ընկերության ղեկավար Արտավազդ Մինասյանին, որը, ի դեպ, ԵՊՀ շրջանավարտ է, Մայր բուհին մշտապես աջակցություն ցուցաբերելու և արդյունավետ համագործակցություն ծավալելու համար:

 

Այնուհետև Գեղամ Գևորգյանը «Krisp» ընկերության համահիմնադիր, ֆիզմաթ գիտությունների թեկնածու Արտավազդ Մինասյանին համալսարանական կրթության զարգացման մեջ մեծ ավանդի, Կիրառական վիճակագրություն և տվյալների գիտություն մագիստրոսական ծրագրի կայացման ու զարգացման գործում նշանակալի ներդրում ունենալու և ԵՊՀ-ի հետ սերտ համագործակցելու համար պարգևատրեց ԵՊՀ ոսկե մեդալով:

 

 

«Վստահ եմ, որ ծրագիրը փայլուն ապագա ունի: Այն, որ ծրագրի շրջանավարտները կարողանում են բարձր վարձատրությամբ աշխատանք գտնել, արդեն իսկ գոհացնող ցուցանիշ է: Ուրախ եմ, որ իմ հարազատ ֆակուլտետում նմանօրինակ ծրագրեր են գործում»,- ասաց Գևորգյանը:

 

Արտավազդ Մինասյանը նշեց, որ պարգևը բավականին խորհրդանշական է իր համար. «Մեր ընկերության հաջողությունն ու աճը հիմնականում պայմանավորված է ԵՊՀ բնական գիտությունների գծով ֆակուլտետների շրջանավարտների աշխատանքով: Ես նույնպես շնորհակալ եմ»:

 

Արթուր Սահակյանը նաև շնորհակալագրեր հանձնեց այն բոլոր ընկերությունների ներկայացուցիչներին, որոնք սերտորեն համագործակցում են ֆակուլտետի, մասնավորապես մագիստրոսական ծրագրի հետ՝ տրամադրելով կրթաթոշակներ:

 

Այլ նորություններ
«ԻՐԱՎԱԲԱՆԱԿԱՆ ԿԼԻՆԻԿԱԿԱՆ ԿՐԹՈՒԹՅՈՒՆ. ՄԱՐՏԱՀՐԱՎԵՐՆԵՐԸ ԵՎ ԶԱՐԳԱՑՄԱՆ ՀԵՌԱՆԿԱՐՆԵՐԸ». ԱՇԽԱՏԱԺՈՂՈՎ ԵՊՀ-ՈՒՄ
ԵՊՀ իրավագիտության ֆակուլտետի և Ռաուլ Վալլենբերգի անվան ինստիտուտի համագործակցության շրջանակում այսօր օտարերկրյա գործընկերների մասնակցությամբ անցկացվել է աշխատաժողով՝ նվիրված իրավաբանական կլինիկական կրթության զարգացմանը:
ԱՇՆԱՆԱՅԻՆ ԴՊՐՈՑՆ ԱՄՓՈՓԵՑ ԻՐ ԱՇԽԱՏԱՆՔԸ. ԱՊԱԳԱ ԼՐԱԳՐՈՂՆԵՐԸ ՀԱՎԱՍՏԱԳՐԵՐԸ ՍՏԱՑԱՆ ՀԱՆՐԱՅԻՆ ՀԵՌՈՒՍՏԱԸՆԿԵՐՈՒԹՅՈՒՆՈՒՄ
ԵՊՀ ժուռնալիստիկայի ֆակուլտետի և Հանրային հեռուստաընկերության հետ համատեղ իրականացվող «Հաղորդավարական գործ և եթերային խոսքի մշակույթ» աշնանային դպրոցն այսօր ամփոփեց իր աշխատանքները: