09.12.2021 | 
Հասարակություն
ՏԵՂԻ Է ՈՒՆԵՑԵԼ «ԵՐԻՏԱՍԱՐԴԱԿԱՆ ՆԵՐԱՌՄԱՆ ԽԹԱՆՈՒՄ՝ ԶԲԱՂՎԱԾՈՒԹՅԱՆ ԵՎ ՄԱՍՆԱԿՑՈՒԹՅԱՆ ՄԻՋՈՑՈՎ» ԾՐԱԳՐԻ ՓԱԿՄԱՆ ԱՐԱՐՈՂՈՒԹՅՈՒՆԸ
ՏԵՂԻ Է ՈՒՆԵՑԵԼ «ԵՐԻՏԱՍԱՐԴԱԿԱՆ ՆԵՐԱՌՄԱՆ ԽԹԱՆՈՒՄ՝ ԶԲԱՂՎԱԾՈՒԹՅԱՆ ԵՎ ՄԱՍՆԱԿՑՈՒԹՅԱՆ ՄԻՋՈՑՈՎ» ԾՐԱԳՐԻ ՓԱԿՄԱՆ ԱՐԱՐՈՂՈՒԹՅՈՒՆԸ
ԵՊՀ Պալեանների անվան դահլիճում այսօր տեղի է ունեցել «Երիտասարդական ներառման խթանում՝ զբաղվածության և մասնակցության միջոցով» խորագրով ծրագրի փակման արարողությունը:

ԵՊՀ շրջանավարտների և կարիերայի կենտրոնի ու «Ապագայի մանդատ» երիտասարդական ՀԿ-ի համագործակցության շրջանակում կյանքի կոչված ծրագրի նպատակն է չեզոքացնել խոցելի երիտասարդների (տեղահանված անձինք, փախստականներ, սոցիալապես խոցելի և այլն) սոցիալական մեկուսացումը՝ նպաստելով նրանց զբաղվածության, տնտեսական և քաղաքացիական մասնակցությանը:

 

Ծրագրի փակման հանդիսավոր արարողությանը ելույթով հանդես եկավ երիտասարդական ՀԿ-ի նախագահ Նելլի Թորոսյանը, որը, շնորհակալություն հայտնելով բոլորին մասնակցության համար, փաստեց, որ երեք փուլով ընթացած ծրագրի իրականացման շրջանակում մասնակիցները ստացել են նաև ինթերնշիփ անցկացնելու հնարավորություն:

 

 

«Մեր փորձագիտական խմբի մտավախություններից մեկն այն էր, որ ինթերնշիփի կազմակերպման գործառնական ուղեցույցի կամ ձեռնարկի բացակայության պատճառով գործատուները չեն կարողանա ավելի արդյունավետ ինթերնշիփեր կազմակերպել»,- ասաց Նելլի Թորոսյանը:

 

Նրա խոսքով, հենց սա էր պատճառը, որ քայլեր ձեռնարկվեցին նաև «Երիտասարդների ինթերնշիփի կազմակերպման գործառնական ուղեցույց»-ի ստեղծման ուղղությամբ, քանի որ զգացվում էր վերջինիս ստեղծման անհրաժեշտությունը:

 

Նելլի Թորոսյանն առանձնահատուկ շնորհակալություն հայտնեց ԵՊՀ շրջանավարտների և կարիերայի կենտրոնի աշխատակիցներին, ծրագրի մասնակիցներին, փորձագետներին և դասընթացավարներին, որոնք ջանք ու եռանդ չեն խնայել ծրագիրը բարձր մակարդակով անցկացնելու համար:

 

 

Շնորհակալություն հայտնելով ծրագրի մասնակից արցախցի երիտասարդներին՝ ԵՊՀ շրջանավարտների և կարիերայի կենտրոնի տնօրեն Լիլիթ Հակոբյանը նշեց, որ նրանք իրենց ուժ ու եռանդով, չպակասող կենսասիրությամբ ծրագրին առանձնահատուկ բովանդակություն են հաղորդել:

 

Այնուհետև տեղի ունեցավ «Երիտասարդների ինթերնշիփի կազմակերպման գործառնական ուղեցույց»-ի ներկայացման արարողությունը, որի հեղինակներն էին Ռուբեն Մարկոսյանն ու Քրիստինե Նիկողոսյանը:

 

 

Ուղեցույցի մասին խոսելիս Ռուբեն Մարկոսյանը փաստեց, որ երկարամյա աշխատանքային գործունեության ընթացքում ինքը բազմիցս բախվել է ինթերնշիփերի կազմակերպման ուղեցույցի բացակայության խնդրին:

 

«Սա էր պատճառը, որ մենք որոշեցինք նմանաբնույթ նախաձեռնությամբ հանդես գալ՝ փորձելով ինթերնշիփերի կազմակերպումն ավելի արդյունավետ դարձնել և լրացնել ոլորտում առկա բացերը»,- ասաց Ռուբեն Մարկոսյանը՝ հավելելով, որ թեպետ ձեռնարկը չի հավակնում առկա բոլոր հարցերի պատասխանները տալուն, բայց այն կարող է լավ հիմք դառնալ հետագայում այս  ուղղությամբ քայլեր անելու և առաջընթաց գրանցելու համար:

 

Ուղեցույցի հեղինակները ներկայացրին վերջինիս բովանդակությունն ու հիմնական դրույթները:

 

Միջոցառման վերջում «Երիտասարդական ներառման խթանում՝ զբաղվածության և մասնակցության միջոցով» ծրագրի մասնակիցներին շնորհվեցին հավաստագրեր:

 

Այլ նորություններ
«ՀԱՄԱԼՍԱՐԱՆԸ ՀԱՅԱԳԻՏԱԿԱՆ ՀՈՒՄԱՆԻՏԱՐ ԿԵՆՏՐՈՆ Է, ՈՐԸ ԳԻՏՈՒԹՅԱՆ ՆՎԱՃՈՒՄՆԵՐԻՆ ՈՒ ՁԵՌՔԲԵՐՈՒՄՆԵՐԻՆ ԻՄԱՍՏ ԵՎ ՀՈՂԵՂԵՆ ՄԱՐՄԻՆ Է ՏԱԼԻՍ». ՏԻԳՐԱՆ ՄԱՆՍՈՒՐՅԱՆ
ԵՊՀ Շառլ Ազնավուրի անվան մշակույթի կենտրոնում տեղի ունեցավ հանդիպում հայ կոմպոզիտոր, Հայաստանի Հանրապետության ժողովրդական արտիստ Տիգրան Մանսուրյանի հետ, որի ընթացքում համալսարանի ռեկտոր Հովհաննես Հովհաննիսյանը մաեստրոյին հանձնեց ԵՊՀ ոսկե մեդալ:
ԵՊՀ ՈՒՍԱՆՈՂՆԵՐԸ ՄՇՏԱՊԵՍ ՏԵՂԵԿԱՑՎԱԾ ԵՆ ԱՇԽԱՏԱՇՈՒԿԱՅԻ ԱՌԱՋԱՐԿՆԵՐԻՑ
ԵՊՀ ինֆորմատիկայի և կիրառական մաթեմատիկայի ֆակուլտետի կոնֆերենս դահլիճում տեղի ունեցավ «CV կազմելու և գործատուին ներկայանալու հմտություններ» խորագրով դասընթաց, որի ավարտին ուսանողները փոխանցեցին իրենց տվյալները՝ հետագայում աշխատանքի առաջարկների վերաբերյալ պարբերաբար տեղեկատվություն ստանալու նպատակով: