11.11.2022 | 
Ուսանողական, Կրթություն, Գիտություն
ԵՊՀ ՍՈՑԻՈԼՈԳԻԱՅԻ ՖԱԿՈՒԼՏԵՏԻ ՀԻՄՆԱԴՐՄԱՆ 18-ԱՄՅԱԿԻՆ ՆՎԻՐՎԱԾ ԳԻՏԱԺՈՂՈՎ ԵՊՀ-ՈՒՄ
ԵՊՀ ՍՈՑԻՈԼՈԳԻԱՅԻ ՖԱԿՈՒԼՏԵՏԻ ՀԻՄՆԱԴՐՄԱՆ 18-ԱՄՅԱԿԻՆ ՆՎԻՐՎԱԾ ԳԻՏԱԺՈՂՈՎ ԵՊՀ-ՈՒՄ
ՈՒԳԸ ամենամյա երիտասարդական գիտաժողովի նպատակն էր նպաստել ուսանողների գիտական ակտիվ գործունեությանը և հանրայնացնել երիտասարդ հետազոտողների աշխատանքները:

Գիտաժողովի ժամանակ ֆակուլտետի յոթ ուսանողներ ներկայացրին զեկույցներ, որոնց հիմնական թեմատիկ ուղղություններն էին սոցիոլոգիան, սոցիալական աշխատանքը, կոնֆլիկտաբանությունը, հանրային կապերը և մարդկային ռեսուրսների կառավարումը: Մասնագիտական հանձնաժողովի ընտրությամբ՝ լավագույն աշխատանքի հեղինակն ստանալու է դրամական պարգև, իսկ երկրորդ և երրորդ տեղերը զբաղեցրած մասնակիցները՝ խրախուսական մրցանակներ: Լավագույն աշխատանքներն ընտրվելու են՝ հաշվի առնելով թեմայի արդիականությունը, զեկույցը ներկայացնելու հմտությունները, ժամանակի կառավարման կարողությունը, հետազոտական մեթոդների ու խնդիրների համապատասխանությունը և այլ սկզբունքներ:

 

ԵՊՀ կիրառական սոցիոլոգիայի ամբիոնի վարիչ Արթուր Աթանեսյանը մինչ գիտաժողովի մեկնարկը հանդես եկավ ողջույնի խոսքով, հակիրճ ներկայացրեց ֆակուլտետի 18-ամյա պատմությունը և ուսանողների գիտական գործունեությունը։

 

 

Երիտասարդական գիտաժողովի կազմակերպիչների խոսքով՝ այս կոնֆերանսը խորհրդանշական է, քանի որ համավարակի պատճառով այն չի կայացել 2020 թվականին, իսկ նախորդ տարի կազմակերպվել է առցանց եղանակով:

 

Սոցիոլոգիայի ֆակուլտետի ՈՒԳԸ նախագահ Արմինե Ղալամդարյանը մեզ հետ զրույցում մատնանշեց ֆակուլտետի պարբերական զարգացումները, ապա հավելեց, որ ֆակուլտետի համար կարևոր է գիտական գործունեություն ծավալող ուսանողներին ամեն կերպ օգնելը, որպեսզի նրանք կարողանան պատշաճ ներկայանալ ու ներկայացնել իրենց հետազոտություններն ու վերլուծությունները:

 

 

ԵՊՀ սոցիոլոգիայի ֆակուլտետի ուսանող Գայանե Դավթյանը ներկայացրեց «Հայաստանի Հանրապետությունում ՀՀ քաղաքացիների վստահության մակարդակը պետական ինստիտուտների նկատմամբ» թեմայով զեկույց: Գայանեի խոսքով՝ ինքն առաջին անգամ է մասնակցում գիտաժողովի, և սա փորձ է հասկանալու, թե ինչպես պետք է ներկայանալ գիտաժողովներին։

 

 

«Մեր ֆակուլտետի պրոֆեսորադասախոսական անձնակազմը մշտապես կապ է պահում ուսանողների հետ՝ գիտական աշխատանքներ գրելու, հոդվածներ տպագրելու, հետազոտական էթիկայի պահպանման և այլ հարցերում օգնելու համար:

Անչափ կարևորում եմ այն, որ ուսանող-դասախոս ամուր կապի շնորհիվ մենք կարողանում ենք գիտական հաջող արդյունքներ գրանցել»,- ասաց Գայանեն:

 

 

Նշենք, որ միջոցառմանը ներկա էին ԵՊՀ սոցիոլոգիայի ֆակուլտետի պրոֆեսորադասախոսական կազմի ներկայացուցիչներ, ասպիրանտներ, ուսանողներ և ոլորտով հետաքրքրված այլ անձինք։

 

Այլ նորություններ
ՀՀ-ՈՒՄ ՂԱԶԱԽՍՏԱՆԻ ԴԵՍՊԱՆԸ ԳՐՔԵՐ ՆՎԻՐԵՑ ԵՊՀ ԱՐԵՎԵԼԱԳԻՏՈՒԹՅԱՆ ՖԱԿՈՒԼՏԵՏԻ ԳՐԱԴԱՐԱՆԻՆ
ԵՊՀ արևելագիտության ֆակուլտետի թյուրքագիտության ամբիոնին առընթեր գործող Աբայի անվան ղազախերենի, Ղազախստանի պատմության ու մշակույթի կենտրոնը կրկին հյուրընկալել էր ՀՀ-ում Ղազախստանի արտակարգ և լիազոր դեսպան Բոլատ Իմանբաևին: Դեսպանը կենտրոնի գրադարանին է նվիրել Ղազախստանի նախագահ Կասիմ-Ժոմարտ Տոկաևի հեղինակած գրքերը:
ՏԵՂԵԿԱՏՎԱԿԱՆ ՏԵԽՆՈԼՈԳԻԱՆԵՐԻ ԴԵՐԸ ԱՇԽԱՐՀՈՒՄ․ ԿՐԹՈՒԹՅՈՒՆԻՑ ԱՇԽԱՏԱՇՈՒԿԱ
21-րդ դարը նորարարական բացահայտումների ժամանակաշրջան է, որում մեծ դերակատարում ունեն տեղեկատվական տեխնոլոգիաները (ՏՏ)։ Դրանք ներթափանցել են մարդկային գործունեության գրեթե բոլոր ոլորտներ՝ առաջարկելով առօրյայի և աշխատանքային գործընթացների դյուրին ու արդյունավետ կազմակերպման ուղիներ։