Օրացույց

Հեղինակի որոնում

Ա | Բ | Գ | Դ | Ե | Զ | Է | Ը | Թ | Ժ | Ի | Լ | Խ | Ծ | Կ | Հ | Ձ | Ղ | Ճ | Մ | Յ | Ն | Շ | Ո | Չ | Պ | Ջ | Ռ | Ս | Վ | Տ | Ր | Ց | ՈՒ | Փ | Ք | Օ | Ֆ

Նորություններ

ԵՊՀ գիտական հարցերի գծով պրոռեկտոր Ռաֆայել Բարխուդարյանի, ԵՊՀ միջազգային համագործակցության վարչության պետ Ալեքսանդր Մարգարովի և բուհի պրոֆեսորադասախոսական անձնակազմի հետ հանդիպման ժամանակ բանախոսը նախանշեց կոնկրետ գործողությունների ծրագիր, որի հիմնական գաղափարախոսությունն է՝ միավորել գիտությունը, կրթությունը և ճարտարագիտությունը:

 

 

Նա առաջարկում էր գիտության, կրթության և ճարտարագիտության ոլորտներում մի շարք նորարար մտքեր, ինչպիսիք են՝ գիտական այնպիսի խնդիրների լուծումներ, որոնք հետաքրքրություն են ներկայացնում տիեզերագիտության բնագավառում, ինչպես նաև արդեն եղած կրթական ծրագրերի հիման վրա ստեղծել նորերը, որոնք կտան ճարտարագիտության, ֆիզիկայի ոլորտների մասնագետներ և այլն:

 

Հանդիպման ժամանակ քննարկվեցին նաև կրթական նախագծերի հետ կապված տարաբնույթ գաղափարներ։

Երևանի պետական համալսարանի և Ֆրեզնոյի համալսարանի միջև առկա է երկարամյա գործակցային կապ։ Այդ մասին մեզ հետ զրույցում վկայեց նաև Բարլոու սարկավագ Տեր-Մկրտչյանը՝ մատնանշելով համագործակցության շրջանակում իրագործված մի շարք ծրագրեր ու նախագծեր:

 

«Անցած երեսուն տարիներու ընթացքին կատարած ենք ուսանողներու փոխանակում, իրագործած ենք օրիորդներու (իմա՝ ուսուցիչների- ՄՄ) վերապատրաստումի ծրագիր եւ զանազան այլ ծրագիրներ: Ես յաճախ եմ Ֆրեզնոյէն ուսանողներ բերել Հայաստան: Ամէնէն կարեւորն ան է, որ ԵՊՀ-ն աջակցեր է զիս ատոնց իրագործումի հարցերուն մէջ»,- վստահեցնում է Ֆրեզնոյի համալսարանի հայագիտության ամբիոնի վարիչը։

 

 

Սարկավագ Տեր-Մկրտչյանի խոսքից արդեն իսկ պարզ է դառնում՝ ինքը որքան է կարևորում հայագիտական ոլորտի զարգացմանն ուղղված քայլերը, ինչի վառ օրինակներից են ուսանողներին իր տրամադրած կրթաթոշակները: Կրթաթոշակի կարևորության մասին խոսելիս նա առանձնահատուկ ընդգծում է դրա դերը՝ այն համարելով ուսանողների առաջադիմությունը խթանող գործոն։

 

«Կը համարեմ, որ «Ցեղասպանագիտութեան» ծրագիրը մեծ կարեւորութիւն ունի: Պէտք ունինք մասնագէտներու, որ Ցեղասպանութեան մասին քաջատեղեակ ըլլան: Կ’ուզէի քաջալերել ուսանողները, որ լաւագոյնն ընեն եւ ըլլան գերազանց մասնագէտներ»,- նշում է մեր զրուցակիցը:

 

Ոլորտի լավագույն մասնագետներից մեկը դառնալու ձգտումն էլ Շուշանին բերել է Երևանի պետական համալսարան: Շուշանը տարիներ անց նորից վերադարձել է հարազատ բուհ, այս անգամ՝ ցեղասպանագետ դառնալու որոշմամբ:

 

«Պատմության ֆակուլտետում սովորելու ժամանակ Ցեղասպանության վերաբերյալ բազմաթիվ հարցերի պատասխաններ ստացել էի, սակայն որոշեցի գիտելիքս դարձնել առավել ընդգրկուն։ Դիմելով ծրագրին՝ ստացել եմ ինչպես Հայոց եղեռնի, այնպես էլ աշխարհում տեղի ունեցող ցեղասպանություններին վերաբերող հարցերի մանրազնին պատասխաններ, որոնք օգնում են կատարելու համակողմանի վերլուծություն»,- վստահեցնում է Շուշանը:

 

 

Մեզ հետ զրույցում նա պատմում է՝ դպրոցում աշակերտներին փոխանցում է ԵՊՀ-ում ստացած իր գիտելիքները: Նրա համոզմամբ՝ լավ մասնագետ դառնալու կարևոր գրավականներից է նաև դպրոցական տարիներին ձեռք բերած հիմնարար կրթությունը:

 

«Երեխաները ապագան կերտողներն են. մեր հայրենիքի հարատևումն ուղիղ կապ ունի աշակերտների հայրենաճանաչության հետ»,- ոգևորությամբ ասում է Շուշանը, և այդ ոգևորությունն ի ցույց է դնում նրա՝ աշակերտների հանդեպ տածած մեծ սերը:

 

ԵՊՀ մագիստրանտը նույն ոգևորությամբ է խոսում նաև իր մասնագիտության մասին, ապա հավելում, որ ստացած կրթաթոշակը պարտավորեցնում է ոչ միայն նույն ոգով շարունակելու ուսումնառությունը, այլև ձգտելու ավելիին, իսկ ավելիի վերաբերյալ նա ասաց հետևյալը․ «Մեծագույն ցանկությունս է Երևանի պետական համալսարան մուտք գործել դասախոսի կարգավիճակով․․․»։

 

Մարինե Մկրտչյան

Դեսպանը դասախոսության սկզբում արաբագիտության ամբիոնի ուսանողներին և պրոֆեսորադասախոսական անձնակազմին ներկայացրեց իր կենսագործունեությունը: Նա ընդգծեց, որ իրենց տանը շատ են կարևորել հայկական ավանդույթների և մշակույթի պահպանումը, միշտ խոսել են հայերեն։

 

 

Դեսպանը պատմեց նաև Սիրիայի մշակութային կյանքի ու այնտեղի հայկական համայնքի ներկայիս վիճակի մասին: Անդրադառնալով Սիրիայում հայկական համայնքի մշակութային կյանքին՝ դեսպանը նշեց, որ հայերը փորձում են վերականգնել մինչ պատերազմն ունեցած համայնքային ակտիվ կյանքը։ Այդ նպատակով կազմակերպում են տարաբնույթ հանդիպումներ, նշում են հայկական տոները, եկեղեցիներում պատարագներ են մատուցում։

 

Այնուհետև բանախոսն անդրադարձավ տարբեր երկրների (Օման, Ռուսաստան, Չինաստան, Արաբական Միացյալ Էմիրություններ) հետ Սիրիայի մշակութային կապերին և խոսեց մշակութային ժառանգության պահպանման հարցում դրանց ունեցած կարևորության մասին։

 

 

Ն. Արիսյանը կարևորեց նաև ՅՈՒՆԵՍԿՕ-ի՝ ոչ նյութական մշակութային ժառանգության ցանկում Սիրիայի մշակութային արժեքների ընդգրկմանն ուղղված ջանքերը, ինչպես նաև սիրիական պատերազմի ընթացքում վնասված կամ փլուզված մշակութային հուշարձանների վերականգնման աշխատանքները։

 

Ն. Արիսյանը ողջունեց ուսանողների մասնագիտական ընտրությունը և կարևորեց արաբերենի և արաբական մշակույթի ուսուցումը Հայաստանում, ասաց, որ մասնագիտական գրականություն կարդալը և շփվելը լեզվակիրների հետ օտար լեզու սովորելու լավագույն միջոցներից են։

 

Նշենք, որ ԵՊՀ-ում մշտապես կարևորվում է այն, որ ուսանողները հաղորդակից լինեն այլ պետությունների մշակութային կյանքին:

Մրցույթին մասնակցել են Երևանի պետական համալսարանի, Հայաստանում ֆրանսիական համալսարանի, Հայ-ռուսական համալսարանի և ՀՀ ոստիկանության կրթահամալիրի՝ իրավագիտության ֆակուլտետները ներկայացնող 5 թիմեր։

 

Մրցույթն անցկացվել է երկու փուլով՝ գրավոր և բանավոր: Գրավոր փուլում թիմերը ներկայացրել են հաճախորդի պահանջ–դիմումը բանկին և ապահովագրական ընկերության պատասխանը հաճախորդին, իսկ բանավոր փուլում մրցել միմյանց դեմ՝ ներկայացնելով և´ հաճախորդի, և´ ապահովագրական ընկերության շահերը։

 

Մրցույթի բանավոր փուլը գնահատել են ֆինանսական ոլորտի իրավաբանները, վերոնշյալ համալսարաններում դասավանդող դասախոսները և Ֆինանսական համակարգի հաշտարարի գրասենյակի աշխատակիցները։

 

 

Եզրափակիչում մրցել են ԵՊՀ երկու թիմերը։ Առաջին թիմի անդամներն էին Ղազարյան Իգորը, Գաբրիելյան Մարիետան և Գևորգյան Մարիետան, իսկ երկրորդ թիմինը՝ Տոնոյան Ալլան, Մովսիսյան Էդվարդը, Հովհաննիսյան Մարիան, Մնացականյան Անահիտը։

 

Մրցույթի հաղթող է ճանաչվել Երևանի պետական համալսարանը ներկայացնող երկրորդ թիմը։

 

 

Մրցանակներ են շնորհվել նաև «Լավագույն պահանջ-դիմում», «Լավագույն պատասխան» և «Լավագույն բանախոս» անվանակարգերում հաղթող ճանաչված մասնակիցներին։ Հատկանշական է, որ առաջին երկու մրցանակները ևս ստացել են ԵՊՀ թիմերը։

Վարպետության դասն ուղղված էր գործնական և տեսական գիտելիքի զուգորդմանը։ Այս ուղղությամբ կառավարման և գործարարության ամբիոնը պարբերաբար կազմակերպում է հանդիպումներ բիզնեսի ոլորտի ներկայացուցիչների և հմուտ մասնագետների հետ։ Այդ միջոցառումները ուսանողներին հնարավորություն են տալիս ծանոթանալու տարբեր կազմակերպություններում առկա իրադրության նկարագրությանը, ինչպես նաև գտնելու կառուցողական լուծումներ։

 

Հանդիպման բանախոսն էր «SSB Academy»-ի հիմնադիր տնօրեն Տարոն Պապիկյանը, որը ուսանողներին ներկայացրեց շուկայագիտության համակարգը որպես բիզնեսի արժեքաստեղծ շղթա։

 

Բանախոսն անդրադարձավ մարքեթինգային վերլուծությունների և հետազոտությունների կարևորությանը, ներկայացրեց մարքեթինգային հաղորդակցական ուղիների ավանդական և ժամանակակից գործիքակազմը՝ առավելապես կենտրոնանալով թվային մարքեթինգի գործիքների դիտարկման վրա։

 

Տ. Պապիկյանի խոսքով՝ մրցունակ մասնագետ դառնալու ճանապարհին կարևոր է ունենալ բիզնեսի տեսլական և կազմակերպության գործունեությունը պատկերացնել համակարգված մոտեցմամբ։

 

 

 

Նշենք, որ վարպետության դասին մասնակցում էին տնտեսագիտության և կառավարման ֆակուլտետի «Ֆինանսներ» և «Կառավարում» մասնագիտությունների բակալավրիատի ավարտական կուրսի ուսանողները: