Օրացույց

Հեղինակի որոնում

Ա | Բ | Գ | Դ | Ե | Զ | Է | Ը | Թ | Ժ | Ի | Լ | Խ | Ծ | Կ | Հ | Ձ | Ղ | Ճ | Մ | Յ | Ն | Շ | Ո | Չ | Պ | Ջ | Ռ | Ս | Վ | Տ | Ր | Ց | ՈՒ | Փ | Ք | Օ | Ֆ

Նորություններ

  • «ՄՐՑՈՒՅԹՆԵՐՆ ՈՒՍԱՆՈՂԻ ՀԱՄԱՐ ՀԻԱՆԱԼԻ ԱՌԻԹ ԵՆ ՎԵՐԱՐԺԵՎՈՐԵԼՈՒ ՍԵՓԱԿԱՆ ԿԱՐՈՂՈՒԹՅՈՒՆՆԵՐԸ». ԱՇՈՏ ՄԿՐՅԱՆ

    «ՄՐՑՈՒՅԹՆԵՐՆ ՈՒՍԱՆՈՂԻ ՀԱՄԱՐ ՀԻԱՆԱԼԻ ԱՌԻԹ ԵՆ ՎԵՐԱՐԺԵՎՈՐԵԼՈՒ ՍԵՓԱԿԱՆ ԿԱՐՈՂՈՒԹՅՈՒՆՆԵՐԸ». ԱՇՈՏ ՄԿՐՅԱՆ

    26.01.2023
    ԵՊՀ հայ բանասիրության ֆակուլտետի ուսանող Աշոտ Մկրյանը մագիստրոսի կրթական ծրագրով «Լավագույն ուսանող» հանրապետական մրցույթի հայագիտական ոլորտում 2-րդ տեղի մրցանակակիր է: Աշոտի հետ զրույցը ուղենշում է, թե ինչ ճանապարհ է անհրաժեշտ անցնել լավագույն ուսանող ճանաչվելու համար:

  • ԻՆՉՊԵ՞Ս ԴԻՄԵԼ «ԷՐԱԶՄՈՒՍ+» ՓՈԽԱՆԱԿՄԱՆ ԾՐԱԳՐԻՆ. ՈՒՂԵՑՈՒՅՑ

    ԻՆՉՊԵ՞Ս ԴԻՄԵԼ «ԷՐԱԶՄՈՒՍ+» ՓՈԽԱՆԱԿՄԱՆ ԾՐԱԳՐԻՆ. ՈՒՂԵՑՈՒՅՑ

    25.01.2023
    ԵՊՀ ուսանողներն ու ասպիրանտները յուրաքանչյուր կրթական աստիճանում հնարավորություն ունեն մեկ անգամ մասնակցելու «Էրազմուս+» փոխանակման ծրագրին և կրթություն ստանալու եվրոպական մի շարք բուհերում։ Ընդհանուր ուսումնառության ժամկետը չի կարող լինել 3 ամսից պակաս և 12 ամսից ավելի:

  • ԵՊՀ-ՈՒՄ ՆԱԽԱԳԾՎՈՒՄ ԵՆ ՏԵՂԵԿՈՒԹՅԱՆ ՄՇԱԿՈՒՄՆ ԱՐԱԳԱՑՆՈՂ ՕՊՏԻԿԱԿԱՆ ՍԽԵՄԱՆԵՐ

    ԵՊՀ-ՈՒՄ ՆԱԽԱԳԾՎՈՒՄ ԵՆ ՏԵՂԵԿՈՒԹՅԱՆ ՄՇԱԿՈՒՄՆ ԱՐԱԳԱՑՆՈՂ ՕՊՏԻԿԱԿԱՆ ՍԽԵՄԱՆԵՐ

    16.01.2023
    Տարիներ առաջ Երևանի պետական համալսարանի ֆիզիկայի ֆակուլտետում սովորելիս Մուշեղ Ռաֆայելյանն էլ հավանաբար չէր պատկերացնի, որ 15 տարի անց կունենա գիտությունների թեկնածուի երկու աստիճան մեկը՝ ԵՊՀ-ից, մյուսը՝ Բորդոյի համալսարանից (Ֆրանսիա) և կղեկավարի մի թիմ, որը կաշխատի օպտիկայի և նեյրոմորֆ ֆոտոնային հաշվարկների ոլորտում:

  • ԸՆԴԱՌԱՋ ԳՆԱԼՈՎ ԵՊՀ ՌԱԶՄԱՎԱՐԱԿԱՆ ՆՊԱՏԱԿՆԵՐԻՆ՝ ԸՆԴԱՐՁԱԿՎՈՒՄ Է ՄԻՋԱԶԳԱՅԻՆ ՀԱՄԱԳՈՐԾԱԿՑՈՒԹՅԱՆ ՇՐՋԱՆԱԿԸ

    ԸՆԴԱՌԱՋ ԳՆԱԼՈՎ ԵՊՀ ՌԱԶՄԱՎԱՐԱԿԱՆ ՆՊԱՏԱԿՆԵՐԻՆ՝ ԸՆԴԱՐՁԱԿՎՈՒՄ Է ՄԻՋԱԶԳԱՅԻՆ ՀԱՄԱԳՈՐԾԱԿՑՈՒԹՅԱՆ ՇՐՋԱՆԱԿԸ

    13.01.2023
    «Խորհրդանշական է, որ «Ամերիկագիտություն» մագիստրոսական նոր ծրագիրը ստեղծվել է մասնավորապես Երևանի պետական համալսարանում։ Մագիստրոսական այս ծրագիրը կոչված է լրացնելու այն բացը, որն առկա է մեր երկրում ամերիկագետներ պատրաստելու համար»,- պատմելով Արիզոնայի պետական համալսարանում վերապատրաստման դասընթացներ անցնելու և դասավանդման ուսանողակենտրոն, փոխներգործուն, ինչպես նաև հետազոտահենք մոտեցումների ու մեթոդների մասին՝ նկատում է «Ամերիկագիտություն» մագիստրոսական ծրագրի դասախոս, ԵՊՀ ամերիկյան հետազոտությունների կենտրոնի աշխատակից, ա․գ․թ․, դոցենտ Տիգրան Սարգսյանը:

  • ԿՐԹԱԿԱՆ ՆՈՐ ՆԱԽԱԳԻԾ․ ԵՊՀ-Ն ԽՐԱԽՈՒՍՈՒՄ Է ՄԻՋԳԻՏԱԿԱՐԳԱՅԻՆ ՀԵՏԱԶՈՏՈՒԹՅՈՒՆՆԵՐԸ

    ԿՐԹԱԿԱՆ ՆՈՐ ՆԱԽԱԳԻԾ․ ԵՊՀ-Ն ԽՐԱԽՈՒՍՈՒՄ Է ՄԻՋԳԻՏԱԿԱՐԳԱՅԻՆ ՀԵՏԱԶՈՏՈՒԹՅՈՒՆՆԵՐԸ

    12.01.2023
    PR (հանրային կապերի) գործիքներ և կրոնական կազմակերպություններ. առաջին հայացքից միմյանց հետ աղերս չունեցող այս երկու տերմինները ոչ միայն արդիական են և առնչակից, այլև դարձել են մագիստրոսական թեզի թեմա: ԵՊՀ ժուռնալիստիկայի և աստվածաբանության ֆակուլտետների մագիստրանտները համատեղ ուսումնասիրում են «Կրոնական կազմակերպությունների PR գործիքները հայաստանյան մեդիայում» թեման։

Հետաքրքրված լինելով տարբեր ոլորտներով՝ Աշոտն ի վերջո ընտրել է լեզվաբանի մասնագիտությունը: Նրա կարծիքով՝ լեզվաբանությունը մարդու առջև բացում է մտածողության մեկ այլ դաշտ, օգնում այլ դիտանկյունից նայել կյանքում ի հայտ եկող բազմաթիվ հարցերի, ինչն էլ մասնագիտության մեջ նրան ամենաշատն է գրավում: Ասում է՝ այդօրինակ մտածողության ձևավորման և ոլորտի լավագույն մասնագետներից մեկը դառնալու ձգտումն էլ բերել է իրեն Երևանի պետական համալսարան:

 

Զրույցի ժամանակ Աշոտը վստահեցնում է` նմանօրինակ մրցույթներն ուսանողի համար հիանալի առիթ են վերարժևորելու սեփական կարողություններն ու գնահատելու անցած ուղին:

 

«Ոգևորիչ է մասնակցել այնպիսի մրցույթների, որտեղ ոլորտի մասնագետները գնահատում են ուսանողական տարիների ընթացքում կատարած աշխատանքդ, խրախուսում ձգտելու ավելիին»,- կարևորում է Աշոտն ու հավելում․ «Դեպի հաղթանակ տանող ճանապարհը բարդ էր ու միևնույն ժամանակ՝ հետաքրքիր և լի գիտական գործունեությամբ»:

 

 

Հատկանշական է, որ Երևանի պետական համալսարանում զարգացող գիտական միտքն Աշոտին գրավել է դեռ առաջին կուրսից: Ուսանողական գիտական ընկերությունը, նրա կարծիքով, լավ հարթակ է գիտության ասպարեզում առաջին քայլերն անելու համար: Ասում է՝ կառույցին անդամակցելով՝ ուսանողներն սկսում են մտածել գիտական հոդվածներ տպագրելու մասին, ինչը, ի դեպ, «Լավագույն ուսանող» մրցույթի կարևոր չափորոշիչներից է:

 

Խոսելով ուսանողական տարիներին գիտական մտածողությունը զարգացնելու կարևորությունից` Աշոտն ընդգծում է ԵՊՀ գիտնականների դերն ու նշանակությունը։

 

«Ուսանելու տարիներին դասախոսներիս ուղղորդմամբ հասցրել եմ հրապարակել գիտական 2 հոդված, որոնցից մեկը տպագրվել է Բեյրութում, մյուսը՝ Երևանում: Առհասարակ նրանք ինձ համար կյանքի ուսուցիչներ են, որոնք ոչ միայն մասնագիտական գիտելիքներ են տալիս, այլև հաջողության հասնելու բանալին…»,- ասում է նա:

 

Աշոտի համոզմամբ՝ ԵՊՀ դասախոսները մասնագիտության նվիրյալներ են և միաժամանակ ունեն իր համար կատարելատիպ համարվող մարդու կարևոր հատկանիշները:  

 

- Նրանց փոխանցած բանալիով արդեն հասցրե՞լ ես հաջողության դռներ բացել,- հարցնում եմ` փորձելով հասկանալ՝ ստացած գիտելիքները գործնականում ինչպես է կիրառում:

 

- Այժմ Երևանի Կոմիտասի անվան պետական կոնսերվատորիայում դասախոսում եմ «Հայոց լեզու և խոսքի մշակույթ» առարկան: «Կրթական օվկիանոսի» մի կաթիլը լինելով՝ ձգտում եմ նպաստել ոլորտի զարգացմանը,- պատասախանում է նա՝ հայացքում ընդգծելով պատասխանատվության մեծ զգացումը:

 

 

Հատկանշական է, որ կրթական համակարգում բարեփոխումներ կատարելու գործում Աշոտը կարևորում է ուսանողների ներգրավվածության դերը: Նրա կարծիքով` հատկապես վերջին շրջանում սկսել է նկատելիորեն ընդգծվել ԵՊՀ-ի ուսանողակենտրոն լինելու փաստը: 

 

Հարցին, թե, իր կարծիքով՝ ինչպիսի՞ն պետք է լինի ուսանողը, որպեսզի նշանակալի դեր ունենա կրթական համակարգում բարեփոխումներ կատարելու գործընթացում, Աշոտը նշում է. «Առանց ջանք թափելու հնարավոր չէ հասնել լուրջ հաջողության: Դրա համար նախևառաջ անսահման նվիրվածություն, ամուր կամք և ծով համբերություն է պետք ունենալ: Այդ հատկանիշներով օժտված է սերմնացանը, որը գիտի սերմը ցանելու, բերքը հավաքելու ժամանակը: Սերմնացան լինելով միայն կարող ենք հասնել մեր նպատակին…»:

Մարինե Մկրտչյան

«Էրազմուս+» շարժունության ծրագրին դիմելու համար անհրաժեշտ է հետևել ծրագրին վերաբերող հայտարարություններին, որոնք ուղարկվում են ԵՊՀ ուսանողների համալսարանական էլհասցեներին, ինչպես նաև տեղադրվում են ԵՊՀ կայքէջի «Օրացույց» բաժնում և ԵՊՀ միջազգային համագործակցության վարչության՝ կայքէջի համապատասխան բաժնում:

 

Շարժունության ծրագրերի դիմումների ընդունման գործընթացը կազմակերպում է ԵՊՀ միջազգային համագործակցության վարչությունը: Մասնակցության դիմումներն անհրաժեշտ է ներկայացնել վարչություն յուրաքանչյուր տարվա սեպտեմբեր-հոկտեմբեր և հունվար-փետրվար ամիսներին:

 

Դիմումներին կից անհրաժեշտ է ներկայացնել հետևյալ փաստաթղթերը՝

  • ինքնակենսագրական,
  • ակադեմիական տեղեկագիր,
  • մոտիվացիոն նամակ,
  • ուսումնառության համաձայնագիր:

Փաստաթղթերը ներկայացնելու գործընթացից հետո վարչության կողմից ձևավորված հանձնաժողովը, ըստ ներկայացված փաստաթղթերի, կազմակերպում է հարցազրույց, որից հետո կատարում է թեկնածուների նախնական ընտրություն․ հանձնաժողովը գնահատում է թեկնածուների ներկայացրած փաստաթղթերը և լեզվի իմացությունը՝ ըստ հաստատված միավորների (ինքնակենսագրական՝ 20 միավոր, ակադեմիական տեղեկագիր՝ 25, մոտիվացիոն նամակ՝ 20, լեզվի իմացություն՝ 20, ուսումնառության համաձայնագիր՝ 25):

 

Հարցազրույցի փուլը հաղթահարելուց, ընդունող բուհի հաստատումն ու անհրաժեշտ փաստաթղթերը ստանալուց հետո անհրաժեշտ է դիմել տվյալ երկրի դեսպանատուն՝ մուտքի «D» կարգի արտոնագիր (Visa) ստանալու համար:

 

Նշենք, որ՝

  • արտերկրում ուսումնասիրվող դասընթացները պետք է համապատասխանեն ուսանողի ուսումնական ծրագրին և կրթական պահանջներին (օրինակ՝ «Նյութագիտություն» կրթական ծրագրի ուսանողը չի կարող դիմել լեզվաբանական ուղղվածությամբ, «Արվեստաբանություն» կրթական ծրագրի ուսանողը չի կարող դիմել մաթեմատիկական ուղղվածությամբ և այլն),
  • ուսումնառության ընթացքն արտերկրում նախատեսում է մեկ կիսամյակում 30 ECTS-ին համարժեք կրթական բաղադրիչներ,
  • ուսանողը կամ ասպիրանտը կստանա «Էրազմուս+» դրամաշնորհ, որը նախատեսված է տեղափոխման և կեցության ծախսերը հոգալու համար (սահմանվող դրամաշնորհի չափը կարող է տարբեր լինել՝ կախված ուղարկող և ընդունող երկրների միջև հեռավորությունից, դիմող ուսանողների թվից և այլ նախապայմաններից),
  • ծրագրին չեն կարող մասնակցել ավարտական կուրսի երկրորդ կիսամյակում սովորող ուսանողները։

Առավել մանրամասն տեղեկություններ «Էրազմուս+» միջազգային կրեդիտային շարժունության ծրագրի և ֆինանսավորման մասին հնարավոր է գտնել ԵՊՀ կայքէջի «Էրազմուս+» բաժնում և «Էրազմուս+» ազգային գործակալության կայքէջում:

 

Հարցերի և հավելյալ տեղեկություններ ստանալու համար անհրաժեշտ է դիմել ԵՊՀ միջազգային կապերի բաժին (կենտրոնական մասնաշենք՝ 4-րդ հարկ՝ 408 սենյակ):

 

Կարինե Հովհաննիսյան

Գիտության մեջ առաջին քայլերն սկսելով ԵՊՀ-ից՝ Մուշեղն այնուհետև հնարավորություն է ունեցել ասպիրանտական կրթություն ստանալու նաև Բորդո քաղաքի գիտահետազոտական ինստիտուտում:

 

Հետաքրքիր է, որ ԵՊՀ-ում ստանալով տեսական կարևոր գիտելիքներ, ապա Բորդոյի համալսարանում կատարելով փորձարարական հետազոտություններ՝ Մուշեղը դեռ երկմտանքի մեջ է եղել՝ ի՞նչ ուղղությամբ շարունակել գործունեությունը:

 

Ասում է՝ մինչև 2018 թվականը չի պատկերացրել, որ ընդամենը 2 տարի անց հիմնելու է լաբորատորիա և նպաստելու է գիտության զարգացմանը՝ հընթացս շարունակելով ստանալ համընդգրկուն գիտելիքներ օպտիկայի վերաբերյալ: Սրան նպաստել է նաև նույն թվականին որպես հետդոկտորական գիտաշխատող Ֆրանսիայի Կաստլեր Բրոսելի լաբորատորիա ընդունվելը:      

             

 

 

Չնայած Եվրոպայում կանխատեսելի մեծ հաջողություններին ու հեռանկարներին՝ Մուշեղը նպատակադրված վերադարձել է Հայաստան՝ այստեղ գիտությամբ զբաղվելու, միևնույն ժամանակ՝ նպաստելու օպտիկայի զարգացմանը:

 

Դժվարություններ, մարտահրավերներ, դրանց հաղթահարմանն ուղղված համառություն ու ինքնամոռաց նվիրում գիտությանը, կամ պարզապես վերադարձ հարազատ գիտական արմատներին….

 

Լաբորատորիայի հիմնումն այնքան էլ հեշտ գործընթաց չէր. երեք անգամ դիմելուց հետո միայն Մուշեղին հաջողվել է ստանալ ՀՀ ԿԳՄՍՆ գիտության պետական կոմիտեի՝ գիտական խմբերի ամրապնդման և նոր լաբորատորիաներ հիմնելու դրամաշնորհը․ Ֆրանսիայից վերադառնալով՝ Մուշեղը նպատակադրվել էր ԵՊՀ-ում ստեղծել կարևորագույն բարդ խնդիրներ լուծող լաբորատորիա։

 

«Մինչ լաբորատորիայի հիմնումն անհրաժեշտ էր հետազոտական թիմ ձևավորել, ենթակառուցվածք ստեղծել և այն համալրել անհրաժեշտ սարքավորումներով: Այսօր, երբ այդ խնդիրները լուծվել են, ի սկզբանե առցանց ձևաչափով աշխատող թիմը սահմանել է գիտական խնդիրներ, որոնք լուծման առավել երկար ժամկետ են պահանջում»,- պատմում է Մուշեղը՝ վերհիշելով ոչ վաղ անցյալում տեղի ունեցածը:   

   

Անդրադառնալով լաբորատորիայի գլխավոր նպատակներին՝ գիտնականը նշում է, որ խմբի հիմնարար հետազոտական հետաքրքրությունները կենտրոնացած են ֆոտոնային բարդ համակարգերում լույս-նյութ փոխազդեցության վրա: Լաբորատորիայում կատարվող հետազոտությունների նպատակը գերժամանակակից օպտիկական հաշվողական տեխնոլոգիաների օգնությամբ բարդ տուրբուլենտ միջավայրերի միջով նկարահանման աննախադեպ արդյունավետության հասնելն է: Ռաֆայելյանը որպես բարդ համակարգի օրինակ մատնանշում է մառախուղի ժամանակ օբյեկտից անդրադարձած ցրված պատկերի վերականգնումը, բայց «դա պարզվում է, եթե լավ գիտես ֆիզիկա և կարողանում ես միջավայրի օբյեկտի ցրված լույսի միջից վերականգնել պատկերը»:

 

Լաբորատորիայի հիմնական հետազոտական ուղղություններից է լինելու նաև ֆոտոնիկ համակարգերի ստեղծումը, որոնք կարողանալու են լուծել արհեստական բանականության խնդիրները: Այլ կերպ ասած՝ ֆոտոնիկան զարգացնելու է արհեստական բանականությունը, իսկ արհեստական բանականությունն օգտագործվելու է ֆոտոնիկայի խնդիրները լուծելու համար:   

 

Հետաքրքիր է, որ խմբում ներգրավված են նաև ուսանողներ, որոնք հնարավորություն ունեն դեռ ուսանողական տարիներից ակտիվորեն մասնակցելու գիտության զարգացմանն ուղղված աշխատանքներին: Ռաֆայելյանի կարծիքով՝ ֆիզիկայի հանդեպ սերը պետք է ձևավորվի դպրոցական տարիներից՝ ներկայացնելով այն իր ամբողջ գրավչությամբ ու ընձեռած հնարավորություններով: Ասում է՝ ֆակուլտետն այս հարցում ևս նախաձեռնող է. ՀՀ մարզերի և Երևանի տարբեր դպրոցների սովորողներ պարբերաբար այցելում են ֆակուլտետ, հետևում այնտեղ կատարվող աշխատանքներին:

 

 

Ռաֆայելյանի համոզմամբ Հայաստանում գիտությամբ զբաղվելու մեծ հնարավորություններ կան, և ԵՊՀ-ն իր գործունեությամբ միտված է խթանելու գիտության բնագավառի զարգացումը:

 

Ամփոփելով խոսքը՝ ԵՊՀ գիտնականը նշում է․ «Կրթական հաստատությունները պետք է ձգտեն ստեղծելու գիտության տարբեր ոլորտների լաբորատորիաներ, որոնք ոլորտով հետաքրքրվածների համար կդառնան իրենց տեսլականի իրագործման միջավայր: Այսօր ԵՊՀ-ն այդ ուղղությամբ լավագույնս իրագործում է անհրաժեշտ քայլերը…»։

 

Մարինե Մկրտչյան

Միջազգային հարաբերությունների ֆակուլտետի «Ամերիկագիտություն» մագիստրոսական ծրագրում դասավանդելուն զուգահեռ՝ Տ․ Սարգսյանը դասախոսում է նաև ԵՊՀ աշխարհագրության և երկրաբանության ֆակուլտետում։ Ինչպես նշում է դոցենտը՝ Ամերիկայի Միացյալ Նահանգների վերաբերյալ աշխարհագրական համակարգված գիտելիքները ծառայել են՝ ի նպաստ այս ծրագրի, ինչպես նաև էական նշանակություն են ունեցել դասախոսների ընտրության մրցույթի տարբեր փուլերում հաջողության հասնելու տեսանկյունից։

 

Տ․ Սարգսյանը դասավանդում է միաժամանակ երկու առարկա՝ «ԱՄՆ էներգետիկ և էկոլոգիական քաղաքականություն» ու «ԱՄՆ քաղաքական աշխարհագրություն և ռեգիոնալիզմ»։ Նրա խոսքով՝ երկուսն էլ առնչվում են տարածաշրջանային աշխարհագրական ուսումնասիրությունների դաշտին և լինելով մասնագիտական հետաքրքրությունների շրջանակում՝ օժանդակում են առավել արդյունավետ և համապարփակ դասապրոցեսի կազմակերպմանը:

 

 

Արիզոնայի պետական համալսարանում չորս ամիս վերապատրաստման դասընթացներին մասնակցելը, տեղի բարձրագույն ուսումնական հաստատություններում առկա առանձնահատկություններն ու կրթական միջավայրը մանրամասն ուսումնասիրելը, ինչպես նաև համալսարանական ակտիվ կյանքում ներգրավված լինելը կատարելագործել են նրա մասնագիտական, մեթոդական և մանկավարժական գիտելիքներն ու հմտությունները։ Ամերիկյան համալսարանում ամրապնդված կարողություններն ու փորձառությունը նպաստել են ԵՊՀ-ում առարկայական արդյունավետ ծրագիր մշակելուն, ինչպես նաև թեմայի լիարժեք համապատկերը ներկայացնող դասախոսություններ կարդալուն։

 

Նախորդ տարվա դեկտեմբերից ԵՊՀ ամերիկյան հետազոտությունների կենտրոնում դոցենտը Եվրոպայի էներգետիկ անվտանգության և ԱՄՆ ներգրավվածության գործիքակազմին նվիրված գիտահետազոտական աշխատանք է կատարում, որի շրջանակում պատրաստվում է համագործակցել ամերիկացի գործընկերների հետ, որոնք հետաքրքրված և մասնագիտացած են ինչպես էներգետիկ անվտանգության, այնպես էլ կայուն ու «կանաչ» էներգետիկայի ոլորտներում։

 

ԵՊՀ միջազգային համագործակցության վարչության պետ, «Ամերիկագիտություն» մագիստրոսական ծրագրի ղեկավար, ք.գ.դ., պրոֆեսոր Ալեքսանդր Մարգարովը, խոսելով Արիզոնայի պետական համալսարանի հետ գրեթե 20-ամյա փոխգործակցային հարաբերությունների մասին, ընդգծում է, որ դա ԵՊՀ-ին ընձեռում է տարբեր ուղղություններով լայնամասշտաբ բովանդակային գործակցության հնարավորություններ, որոնց շնորհիվ հնարավոր է դառնում ի կատար ածել համալսարանի ռազմավարական նպատակները։

 

 

Հիշյալ համագործակցության շրջանակում հաջող գործունեություն ծավալելու շնորհիվ վերջերս տեղի ունեցավ նաև «Հայաստանը, Միացյալ Նահանգները և տարածաշրջանային փոխակերպումները Եվրասիայում. անդրազգային փոխըմբռնման ընդլայնում» խորագրով միջազգային երկօրյա գիտաժողովը, որն այս ծրագրում ԵՊՀ-ի կատարած լրացուցիչ ներդրումներից մեկն էր։

 

«Բոլոր այն նպատակները, որոնք մենք նախապես սահմանել էինք ծրագիրը մշակելիս և մեկնարկելիս, հպարտությամբ կարող եմ ասել, որ հաջողությամբ կյանքի են կոչվել։ Ապագայում ծրագրում ենք ընդարձակել համագործակցային կապը. մագիստրոսական ծրագրի ուսանողներին, բացի ԵՊՀ դիպլոմից, տալ նաև Արիզոնայի պետական համալսարանի հավաստագիր»,- մատնանշում է ծրագրի ղեկավարը։

 

Թվարկելով մագիստրոսական ծրագրի ընձեռած հնարավորություններն ու առավելությունները՝ Ալ․ Մարգարովը առանձնակի շեշտում է նաև ուսանողների՝ մասնագիտական պրակտիկաներին մասնակցությունը։

 

«Արդեն ունենք ուսանող, որը պրակտիկա է անցնում ԱՄՆ դեսպանատանը։ Մագիստրոսական ծրագրում ներառված բոլոր լավագույն ուսանողների համար ստեղծվելու են այսօրինակ հնարավորություններ, քանի որ մենք նախապատրաստում ենք աշխատաշուկայի պայմաններին համապատասխան մրցունակ մասնագետներ»,- մանրամասնում է նա։

 

Ծրագրի հետազոտական բաղադրիչին անդրադառնալիս Ալ․ Մարգարովը փաստում է, որ «Բանբեր Երևանի համալսարանի. միջազգային հարաբերություններ, քաղաքագիտություն» ամսագրի հատուկ թողարկման մեջ ներառվել են այս ծրագրի շրջանակում գրված լավագույն հոդվածները։

 

Նշենք, որ «Ամերիկագիտություն» մագիստրոսական ծրագրում այժմ սովորում է 19 ուսանող, իսկ ԵՊՀ ամերիկյան հետազոտությունների կենտրոնում 2021 թվականից ցայսօր ԱՄՆ-ՀՀ փոխհարաբերությունների և առհասարակ տարածաշրջանում տեղի ունեցող գործընթացների մասին գիտական աշխատանքներ են կատարում 5 փորձագետներ։

 Անի Սուքիասյան

Ժուռնալիստիկայի ֆակուլտետից Կարինե Հովհաննիսյանը և աստվածաբանության ֆակուլտետից Մարիամ Աբրահամյանն այն համարձակներից են, որ ցանկություն են հայտնել դառնալու աննախադեպ նախաձեռնության առաջին մագիստրանտները, ինչը, նրանց խոսքով, ոգեշնչող և միևնույն ժամանակ պարտավորեցնող է։

 

 

Գիտական աշխատանքի ղեկավարներն են ԵՊՀ աստվածաբանության ֆակուլտետի կրոնագիտության ամբիոնի վարիչ, դոցենտ, փ․գ․թ․ Պարգև Բարսեղյանը և ժուռնալիստիկայի ֆակուլտետի դասախոս Սաթենիկ Գրիգորյանը։ Նրանց կարծիքով՝ նման նախագծի մասնակցում են ոչ ստանդարտ մտածողություն ունեցող ուսանողներ, որոնք պատրաստ են նոր ձևաչափի, չեն վախենում առաջինը լինելուց և ունեն հաղորդակցման ճկուն հմտություններ, ինչը երկուստեք կարևոր է ու առանցքային:

 

Թե՛ Կարինեն, թե՛ Մարիամը մագիստրոսական թեզի թեման ընտրել են՝ հիմք ընդունելով դրա արդիականությունն ու անհրաժեշտությունը մեր օրերում ինչպես կրոնական, բարոյահոգեբանական, այնպես էլ մեդիադաշտում գործելակերպի տեսանկյուններից։

 

Թեմայի ընտրությանը զուգահեռ առաջ եկած հիմնական մտավախությունը երկու ուսանողների դեպքում էլ նույնն էր․ իրենց անվան կողքին ո՞ւմ անունն է գրվելու մագիստրոսական թեզի տիտղոսաթերթին։ Ուսանողների առաջին հանդիպումից ու ծանոթությունից հետո մտավախությունները հօդս ցնդեցին, և նպատակը դարձավ մեկը՝ համատեղ ուժերով հասնել լավագույն արդյունքի։

 

Մագիստրանտների ու նրանց գիտական ղեկավարների համար այս գործակցությունը թեմայի համակողմանի ուսումնասիրության, գիտելիքների հարստացման, սովորելու և միաժամանակ՝ սովորեցնելու հնարավորություն է։

 

Ժուռնալիստիկայի ֆակուլտետի ուսանող Կարինեի համար սա նոր ու փոքր-ինչ անծանոթ ոլորտ է։

 

«Ինձ համար շատ հետաքրքիր է ուսումնասիրել մի թեմա, որի վերաբերյալ նախկինում ունեի մակերեսային պատկերացում, իսկ այժմ՝ մագիստրոսական թեզը գրելու ընթացքում, շարունակում եմ սովորել ավելին կրոնի և կրոնական կազմակերպությունների վերաբերյալ»,- ասում է նա։

 

Ի տարբերություն Կարինեի՝ աստվածաբանության ֆակուլտետի ուսանող Մարիամի համար նորություն է ոչ թե կրոնական կազմակերպությունների ուսումնասիրությունը, այլ դրանց կիրառած PR գործիքները։

 

«Այս համագործակցությունը հրաշալի հնարավորություն է ոչ միայն ընդլայնելու մասնագիտական կարողություններն ու մտահորիզոնը, այլև սովորելու թիմային և համագործակցային աշխատելաոճ, որոնց շնորհիվ էլ հաղթահարում ենք առաջացող դժվարությունները»,- ընդգծում է Մարիամը։

 

 

Գիտական ղեկավար Պարգև Բարսեղյանը, շեշտելով այսօրինակ համագործակցությունների կարևորությունը և անհրաժեշտությունը միջֆակուլտետային ու միջմասնագիտական կապերի ընդլայնման առումով, նշում է․ «Արագ զարգացող մեր դարաշրջանում բարդ է դաշտի համակողմանի ուսումնասիրությունը, և սույն թեզի շրջանակում կատարվող հետազոտությունը որոշ չափով լրացնում է այդ բացը»։

 

Սաթենիկ Գրիգորյանն էլ հավելում է, որ այս փոխգործակցության շնորհիվ աշխատանքը դառնում է առավել հագեցած, բազմաբևեռ և գիտական ու փաստական առումով առավել հարուստ։

 

«Միջմասնագիտական մագիստրոսական թեզերի գաղափարն ի սկզբանե եղել է ոգևորիչ ու յուրատիպ։ Ժուռնալիստիկայի ֆակուլտետը միշտ շարժվում է նորին ու նորարարականին ընդառաջ, այդ պատճառով էլ ֆակուլտետը երկրորդ անգամ է նախաձեռնել համատեղ թեզերի գաղափարը»,- նշում է գիտական ղեկավարը։

 

Գիտական խումբն ակնկալում է ունենալ մագիստրոսական որակյալ թեզի պատշաճ ներկայացում, որը նորություն կլինի գիտական հանրույթի և օգտակար՝ ամբողջ հասարակության համար՝ նպաստելով տվյալ ոլորտի վերաբերյալ մեդիագրագիտության տարածմանը։ Նրանք հուսով են, որ իրենց գործակցությունն օրինակելի կլինի մյուս ուսանողների ու դասախոսների համար՝ համագործակցային մագիստրոսական թեզերի նախաձեռնությունը դարձնելով շարունակական։

 

Նշենք, որ միջֆակուլտետային գիտական հետազոտություններ են կատարում ԵՊՀ ժուռնալիստիկայի, աստվածաբանության, փիլիսոփայության և հոգեբանության, տնտեսագիտության և կառավարման ֆակուլտետների մագիստրանտները։

 

Լիլիթ Մկրտչյան